Ka KSU kam don tang lai ngut ki nongïalam, ka jingïakhih bad ki ishu kin ïaidbeit shakhmat: Lambok

Shillong, Nailar 20: Ki nongialam barim jong ka Khasi Student Union kila pynrem jur ïa ki pulit kiba la wan ban pynjot ïa ka ophis trei kam jong ka seng hynrei wat ia ki ïing jong ki para marjan bad ka ophis hadien ba kila kem ïa ki lai ngut ki nongïalam ba rangbah jong ka seng
Ki nongialam ba la shah kem ki kynthup ïa u Presidet u samla Raymond Kharjana, Vice President u samla Pynkmenlang Sanmiet bad General Secretary u samla Reuben A Najiar.
Haba kren bad ki lad pathai khubor u President barim ka Khasi Students’ Union (KSU) u Bah Lambokstar Marngar, ula ong ba ka jingkem ïa ki nongialam kan ym pyntlot ïa ka KSU hynrei kan nang pynjur ïa ka jingiakhih ban pynurlong ïa ki san tylli ki mat jingdawa.
“Lai ngut ki nongialam ba hakhmat kila shah kem.Kaei kaba ngi pynrem ka long ba hadien ba kem ia ki, kila wan bad pynjulor ia ka Ophis bad ruh ïa ki ïing ba marjan.Kane ka dei ka bym lah ban pdiang” ula ong.
Shuh shuh u Bah Lambok u la ong, “Hooid, ki Pulit ki hap ban leh la ka kamram, hynrei ka dei ban long ha ka lynti kaba dei.Ki don ki Rangbah Shnong bad ki Seng Samla.Ka rukom wan rung jong ki sha Shnong ka long kumba ki thwet ïa ki lehnoh.Kila kren a ki ktien sih, byrngem bad pyntieng pynsmiej.Ki tyndong lyer pynsat khmat kila rung sha ki ïingbrirew bad ki khunlung khynnah kila tieng”.
“Ka KSU kam don tang lai ngut ki nongialam.Ka don bun bah ki nongialam na ki District bad ka CEC.Ngim tieng ïa ka jingshah kem.Phi lah ban kem ïano ïano ruh, hynrei ki ishu kin ïai bteng” ula ong.
Ki san tylli ki mat jingdawa kim dei kiba thymmai bad ka Sorkar ka dei ban pyntreikam ïa ki ha ka jaka ban leh klet ïa ki ishu, u la ong.
“Kane ka jingleh jong ka Sorkar ka thmu ban theh umpjyiah ïa ka KSU hynrei kadei ba dang ai ding shuh shuh ban pynkhlain ïa ka jingdawa.Ngi sngew ba ka Sorkar ka kham khein kongsan ïa ka Shree Cement ban ïa ki ishu kiba ktah ïa ki trai muluk” ula ong.
Halor ka huri hura ba mih na ka rally thuk thuk ha kaba 31 tylli ki kali kila shah pynjulor, u Bah Lambok ula ong ba ki runar lehse kila bsuh khlieh ha ka rally ban pynjah burom ïa ka KSU.
Ka KSU kala pynshai ba ki don ki riew shimkabu ha ka rally.Ha ki 9 snem ba nga ïalam ïa ka KSU, nga la iohi ïa ki jingpyrshang ban pynpulom ïa ki prokram ka seng.Ha u 2013 ruh, ka KSU kala shah kynnoh ba thang kali hynrei ki Pulit hadien kila ioh kem ïa arngut ki bar Jylla, ong u Bah Lambok.
Haba pynshai ba ka jingïakhih kam dei kaba pyrshah ïa ki briew na Assam, ula ong Ym dei ban khmih ïa ka kum ka jingpyrshah ïa ki nong Assam.Ka jingiakhih ka long pyrshah ïa ka Sorkar Meghalaya kaba la sngap jar halor kine ki mat jingdawa.
Haba ther ia ka Sorkar Jylla, u Bah Lambok ula ong “Ia phi lah buh ban shong ha Secretariat da ki paidbah.Wat pyrkhat ba u CM, Myntri kam Pohiing lane MLA ka dei ka kam ba shirta.Ka dei ka kam contract ba san snem. Ki paidbah ki don ka bor ban weng ïa phi”.
“Haba u thyrnia u ïalam, u ksai u bud beit.Kaei ka ban jia hadien, ka Sorkar kan hap ban shim ïa ka jingkit khlieh” ong u Bah Lambok.
Haba kylli la ka KSU kan dawa pynlait noh ïa ki nongialam, u bah Lambok ula ong “Ka jingdawa ba hakhmat jong ngi ka long ban pyntreikam ïa ki san tylli ki mat jingdawa.Lada pynlait ne ym pyllait, ka jingïakhih bad ki ishu kin ïaid beit shakhmat”.