Pyntreikam mardor ïa ki 5 tylli ki mat jingdawa ne mad jingïakhih ba tyngeh, kren shai ka KSU ïa ka sorkar

Jowai, Nailar 12: Ka Khasi Students’ Union (KSU) Central Executive Council ha ryngkat ka KSU West Jaiñtia Hills District Unit mynta ka sngi 13 tarik u Nailar kila pynlong ïa ka jingïalang pynsngewthuh paidbah ha Iawmusiang Stand Ummulong halor ki 5 tylli ki mat jingdawa kiba ka sorkar jylla ka dei ban pyntrikam noh hapoh 15 sngi ba la buh por ka ban kut noh haka 18 tarik mynta u bnai.
Kine ki 5 tylli ki mat jingdawa jong ka seng kiba hakhmat eh ki kynthup kaba nyngkong ban pyndam noh ïa ka Public Hearing jong ka Shree Cement. Suspend noh ïa u Deputy Commissioner (DC), Superintendent of Police (SP) ka East Jaiñtia Hills bad ki ophisar jong ka MSPCB bad sdang noh ïa ka departmental proceeding pyrshah ïa ki.
Kaba ar ban pynurlong noh ïa ka Meghalaya Resident Safety & Security Act (MRSSA), 2016, kaba lai ban pynurlong noh ïa ka jingpynkylla (amendment) ïa ka Meghalaya Identification, Registration (Safety & Security) of Migrant Workers Act, 2020. Kaba saw ban pynbeit noh ïa ki jingeh ha ka rukom thungkam jong ka NEIGRIHMS, katkum ka jingkular bala ai.
Kaba san ban pynurlong ïa ka rukom thungkam kaba shai kaba hok bad kaba khuid kiba kynthup ban weng noh ïa ka Personal Interview na ki Post Grade B, C & D kum ba lah bthah na ka Sorkar Pdeng. Ban pyntreikam ïa ki jingkylla ha ka MPSC bad DSC kum ba la ai jingmut ka Seng bad ban don noh ki aiñ/ Standard Operating Procedure (SOP) na bynta kiwei ki recruitment board namar ïa kaba mynta kine ki recruitment board ki thep kam pathar bad katba mon.
Ka seng KSU kala kren shai ba ka sorkar kala dei ban pyntreikam noh ïa kine ki 5 tylli ki mat jingdawa kiba la don ruh napdeng kiba la sahteng da ki phew snem da kaba kren shai ki jingïakhih ba tyngeh kin sdang nangne shakhmat lada ka sorkar ka dang sngap jar. Ha ka juh ka por ka seng ka khot bad wer ïa baroh naduh ki samla pule, ki rangbah kiba trei ha kano kano kam ban ïa snoh kti lang ka seng, namar baroh kine ki jingdawa kim dei na ka bynta ka seng, hynrei ki dei na ka bynta ka jingmyntoi ha ka lawei jong ka jylla hi baroh kawei.
Mynta ka sngi la ïoh ïa ki jingkren na u Laitphar Syngkrem President KSU West Jaintia, Streemly Suchen President KSU East Jaiñtia, Manbha Nongtdu President Hima Sutnga Youth Federation (HSYF), Badon Malngiang Assistant Sports Secretary KSU-CEC, Hopeful Born L. Mawnai Assistant Finance KSU CEC, Shiningstar Kharbihkhiew Environmental Secretary, katba ïa ka jingïalang pat la pynïaid da u Leningard Tariang General Secretary KSU WJHD, ka jingduwai hashwa ban sdang na ka Ladaplin Haiong, Education Secretary War Jaiñtia Circle. Hadien ka jingïalang paidbah ki dkhot jong ka seng ki la ïashim bynta lang ha ka jingrwai ieit ri.