Ki samla pule ki dei ban pyndonkam hok ïa ka por bad kiar ban pyndonkam palat ïa ka mobile: DC

Mawkyrwat, Nailar 13: Ka Ophis jong u District Sports Officer, South West Khasi Hills District, ha ka jingïatreilang bad ka District Administration bad ka District Legal Services Authority, ka la rakhe ïa ka International Youth Day 2026 hapoh ka phangpdeng, “Youth advancing multilateral Co-operation through Technology and Partnership”, ha Multipurpose Hall, Sngap Syiem College, Mawkyrwat.
Ka Deputy Commissioner, South West Khasi Hills District, Mawkyrwat, ka kong A.L. Mawlong, IAS, ka la long ka Kongsan jong kane ka sngi. Ha ka jingkren jong ka ha ka prokram rakhe ïa ka International Youth Day, ka la phah ïa ki khublei kiba sngewbha sha ka Principal jong ka Sngap Syiem College, Mawkyrwat, ki hikai bad ki samla pule da kaba ban jur ruh ïa ka bynta kaba kongsan jong ki samla ban kin leh ha ki shnong ki thaw, ha ka imlang sahlang bad ban tei ïa ka lawei jong ka ri kaba phyrnai.
Haba bynrap ia ka jingkren, ka la ong ba ka International Youth Day ka long ka lad ban ithuh ïa ka bor, ka sap bad ka bynta jong ki samla ha ka imlang sahlang.”Ki samla ki long ka bor, ka jingkyrmen na ka bynta ka lawei jong ka imlang sahlang, ki skul bad kolej bad ki longïing longsem”, ong ka DC.Ym tangkata, ka la ban jur ruh ba ka rta kam dei ban long ka jingkhanglad ïa ka jinglong nongïalam ne ban noh synñiang sha ka imlang sahlang. Ka la kyntu namarkata, ïa ki samla ba kin pyrshang ban wanrah ïa ka jingkylla kaba bha lyngba ki kam kiba rit kaba don ka jingmut kaba skhem bad ka jingthmu ban leh ïa ki kam kiba tei ïa ka lawei jong ki.
Ka kong Mawlong, IAS, ka la kyntu ruh ïa ki samla pule ba kin pyndonkam hok ïa ka por jong ki bad ban buh ryntih ïa ka jingim ha ka rukom kaba janai hapdeng ka pule puthi, ka jingïadei bad kiwei pat bad khamtam eh ka jingpyndonkam ïa ki mobile phone kam dei ban long palat pud. Namarkata, ka la kyntu ïa ki samla ba kin nang pyndonkam ruh ïa ka por jong ki da ka jingkitkhlieh bad ban pynthikna ba kam dei ban long ka daw kaba pynphai-dien ïa ka jingpule bad ban don ruh ka jinglong ryntih ne discipline ha kiei kiei baroh.
Ha kane ka prokram ka la don ruh ka jingkren ai mynsiem bad ban pynshlur ïa ki samla na u bah L.G.M. Kharmih, MCS, Additional Deputy Commissioner, South West Khasi Hills District, ki jingshad bad jingrwai tynrai da ki samla pule, bad ka jingtem Guitar Instrumental na u bah Khlaiñbor Ramsiej, uba long u nongshimbynta ha ka Youth Engagement Programme. Hadien kata bud ka jingkren na ka kong B. Majaw, MJS, Chief Judicial Magistrate-cum-Secretary, District Legal Services Authority, South West Khasi Hills District, Mawkyrwat.
Ha kane ka sngi ka la din ruh ka jingsam ïa ki memento sha ki nongshim bynta na ka bynta ka International Youth Day kiba long ki nongshimbynta jong ka Chief Minister’s Youth Engagement Programme 2025-26, kata ka Ibameaihun Marbaniang bad u Wankyrshanbor Marngar kynthup ruh ïa u bah Steveford Marweiñ, MCS, u bah Pynkhraw Kharjahjrin, MDC, bad u samla Jimmyson Marweiñ, International Athlete, kum ka dak jong ka jingithuh ïa ki jingjop bad ka jingshim bynta jong ki.
Ka prokram ka la poi sha kaba kut da ka jingaikhublei na kong Daisy Marweiñ, District Sports Officer, South West Khasi Hills District, Mawkyrwat.