2 taïew ai por ka ïingbishar HC ïa ka NHIDCL ban shna jingker ha ka surok Shillong-Dawki

Shillong, Nailar 12 : Ka ïing Bishar High Court jong ka jylla ka la hukum ïa ka NHIDCL ban tei ne shna ïa ki jingker narud surok ha baroh ki jaka kiba don jingma ha shi lynter ha surok Shillong-Dawki hapoh ka hynriew taiew.
Haba bishar ïa ka mukotduma PIL ha ka sngi ba-ar, u DSGI Dr N Mozika ula pyntip ïa ka ïing Bishar ka Chief Justice Revati Mohite Dere bad Justice W Diengdoh ba ka kompani kala dep aiti ïa ka kontrak ban pyntrei ïa ka kam bad yn pyndep ïa ka hapoh ka hynriew taiew.
“Ia ka kontrak lah dep ban ai ban pynthikna ba ki jingker kin ïeng ha baroh ki jaka kiba idon jingma. ïa kane ka kam yn pyndep hapoh ka hynriew taiew” ong u Dr Mozika haba aiti ia ka kaiphod halor ka jingïaid ka kam kat haduh ka 11 tarik Nailar.
Ula pyntip ruh ïa ka ïing Bishar ba ka NHIDCL ka la aiti ïa ka ambulance kaba la pynbiang lut ki tiar nadong hadong sha ka PHC ha Pongkung bad ka la dep shna ïa ka surok ba shah rong dang shen.
Halor ka jingkam ïa ki jingjulor, ka ïing Bishar ka la pynpaw ba ka PWD ka la phah ïa ka mang pisa ba 1.72 klur tygnka sha u ADC ka East Khasi Hills.
U Dr Mozika u ïathuh ba ka NHIDCL kan sa leh la ka jong ka jingkheiñ jingdiah ïa ka jingjulor ka Mawlieh LP school bad yn sa aiti ïa ka kaiphod ha tarik ban wan.
Ka ïing Bishar ka la bthah ïa u Deputy Commissioner ka East Khasi Hills ban leh ei ei halor ka shithi ka PWD ba 20.05.2026 ba ïadei bad kane ka kam.
Ka ïing Bishar kala bthah ruh ïa ka NHIDCL ban siew 1 lak tyngka sha u Amicus Curiae Philamon Nongbri haba pyrkhat ïa ka jingïarap ba ula ai kynthup ka jingleit jurip ïa ka jaka, hapoh ka shi taiew.ïa kane ka kam la buh ban bishar biang ha ka 7 tarik Nailur.