Ngan shong beit kum u Acting Syiem ka Hima Mylliem, katba ym pat ïoh jingthoh na KHADC: Alban

Shillong, Nailar 12: Hadien ba ka Meghalaya High Court kala pynksan ïa u Paiem Ainam Manik Syiem bad bthah ïa ka Khasi Hills Autonomous District Council (KHADC) ban thung biang kum u Syiem ba pura jong ka Hima Mylliem, mynta kala kylla drama ha kaba u Bah Alban Fredrick Syiem u la ong ba un ym aiti ïa ka shuki ne ka khet katba ym pat ioh hukum na KHADC.
Kum ban shu kdew ba u Paiem Ainam Manik Syiem ha ka 11 tarik u la wan shimti biang kum u Syiem ba pura jong ka Hima Mylliem hadien ba ka ïing kashari kala pynduh pyndam noh ïa ka rai sospon pyrshah ïa u.
Na ka liang u Bah Alban Fredrick Syiem ha ryngkat bad ki Myntri bad u Basan dang step kila wan poi hapoh ka ophis jong u Syiem ka Hima Mylliem bad kham hadien la wan poi pat sa u Ainam Manik Syiem bad ki Myntri kiba la shu hap ban shong hapoh ka jaka ba ju shim kam u Syiem.
Ka kynhun jong u Bah Alban Fredrick Syiem lem bad ki Myntri ki ïa shong beit hapoh ka karma trei kam jong u Syiem bad ruh ha karma jong u Syiem Khynnah, katba ka kynhun jong u Paiem Ainam Manik Syiem ki hap shong ha ka jaka ba ju pynlong dorkar.
Namar kane ka jingjia, ki nongtrei jong ka ophis u Syiem ka Hima Mylliem kila hap ban shu shong kai namar ba ym shym la shah ïa ki ban trei kam.
Na ka liang u nonglum khubor jong u Mawphor u la ioh ban ïa kren bad u Bah Alban Fredrick Syiem u la ong, “Katba ym pat ioh ka hukum na District Council un ym pat aiti ïa ka kam namar ba ïa u la thung hi da ka District Council kum u Acting Syiem jong ka Hima Mylliem”.
“Lada ka District Council kala pynmih da ka order ne ka hukum nga kloi ban aiti ïa ka shuki sha u Ainam Manik Syiem” ong u Bah Alban.
Haba kylli halor ka rai jong ka Meghalaya High Court, u Bah Alban u la ong ba kim don jingtip eiei ruh em namar ba ki khlem ioh ïa kata ka rai jong ka ïing kashari bad u la kyntait ban kynthoh eiei halor ka rai jong ka.
Shuh shuh haba kylli ba phi dang niew ne em ïa lade kum u Acting Syiem, u Bah Alban u la ong hooid u dang shim beit ba u dang dei u Acting Syiem namar ba ka District Council kam shym pat la pynmih kano kano ka hukum.
Na kane ka jingjia tang shu dap 5 baje janmiet ka kynhun jong u Paien Ainam kila mih noh na ka ophis katba ka kynhun u Acting Syiem la hap ban lei tong da ki pulit ba kin mih noh shabar namar ba ka kynta trei kam kala kut.
Nalor ki Pulit Syiem la wan ruh ki pulit na Lumdiengjri Police Station ban peit ioh mih kano kano ka jingklumar ha ka ophis trei kam jong u Syiem ka Hima Mylliem.