Hiar ka kamai kajih naduh u 2014 la donkam ban wanrah jingpynkylla ka Sorkar Pdeng ha ka MMDR Act :UDP
Naduh ba khang tih dewïong ha ka jylla
Shillong, Nailar 12 : Ka United Democratic Party (UDP) ka la kyntu ïa ka Sorkar Pdeng ban pynkylla ïa ka aiñ Mines and Minerals (Development and Regulation) Act, 1957 bad ban sdang biang ïa ka jingtih dewiong ha Meghalaya namar naduh ba la khang ïa ka jingtih dewiong naduh u 2014 ka kamai kajih ki paidbah ka la hiar palat ha ka jylla.
Ïa kane ka mat, ka UDP ka rah haka jingleit ka kynhun ba la ïalam da u Myntri Sorkar ka u Bah Lahkmen Rymbui ha ka jingïakynduh ïa u Myntri ka tnat kam pohïing ka Sorkar Pdeng u Amit Shah ha New Delhi.
Haba kren sha ki lad pathai khubor, u Bah Lahkmen u la ong ba ka jingtih dewiong ha ka Jylla ka la sahkut naduh ka hukum jong ka ïing Bishar ha u snem 2014, kaba ktah ïa ki lak ngut kiba kamai jakpoh naka kam tih dewiong.
“Naduh u snem 1970 ngi la leh ïa ka kam tih dewiong ha ka Jylla jong ngi, bad haduh u snem 2014 ka la ïaid beit ïaid ryntih. Hynrei kynsan kynsan, namar ka jingpynmih hukum jong ki bor ba dei khmih, ka la ktah bad ka la pynsangeh ïa ka kamai kajih jong ki briew ha ka Jylla jong ngi” la ong u Bah Lahkmen.
U la kdew ba naduh u snem 2018, ka Sorkar ba la ïalam da u Conrad Sangma ka la pynbor ban pynkylla ïa ka aiñ MMDR ban pyni ïa ka rukom long trai jaka jong ka Meghalaya, ha kaba ki riew shimet ki dei ki trai khyndew.
“Ngi la kyntu ba dei ban pynkylla ïa ka aiñ MMDR, 1957, da kaba shim khia ïa ka jinglong jong ka jinglong trai jaka jong ngi,” la ong u Bah Lahkmen bad bynrap ba ka jingtih dewiong daka Open Cast Mining kam long hapoh ka Jylla namar ki Seam dewiong ki long tang 1-2 phut haba ïanujor bad 7-8 phut shawei pat.
Da kaba kdew ïa u Prof GG Swell, u la ong ba ïa ka jingtih dewiong kham mynshwa ha Meghalaya la ju kheiñ kum ka Cottage Industry.
“Kumta, ki dang ïakren ban pynkylla ïa ka aiñ khnang ba wat u briew uba don jaka ruh un lah ban tih dewiong,” u la bynrap.
U Bah Lahkmen ula ïathuh ba u Amit Shah u la pynthikna ba yn sa thaw ïa ka Committee ban eksamin ïa katei ka kam.
Ka UDP ka la kyntu ruh ïa ka Sorkar Pdeng ban burom ïa ka jingsngew jong ki paidbah ka Jylla Meghalaya halor ka kam jingtih Uranium.