Khlem artatien yn shah knieh lut noh baroh ki hok lada treikam ka FCRA: Ma Pala

Nongstoiñ, Nailar 12: Ki dkhot nongkitkam ba hakhmat ryngkat ki nongkyrshan jong ka seng Congress lane Indian National Congress (INC) lyngba ka District Congress Committee ha West Khasi Hills, ha ka sngi balang ki la ïa mih paidbah sha surok ha sor Nongstoiñ, kum shi bynta ban pynpaw pyrshah ïa ka sorkar kmie, kaba thmu ban pyntreikam ne ban pynlong aiñ noh ïa ka Foreign Contribution (Regulation) Amendment Bill 2026.
Shuwa ban sdang ïa katei ka jingïaid paidbah ne rally, la sdang shwa da ka jingïalang ha Congress Bhavan Nongstoiñ West Khasi Hills District. Hadien kane la ïaid paidbah da ka kjat shaduh sha phyllaw ka Market Complex New Nongstoiñ ryngkat ki jingpyrta ïa ki kyntien pynrem da kaba ong, ‘Down Down BJP’, ‘we condemn FCRA Amendment Bill 2026’ bad kiwei kiwei ki jingpyrta ryngkat ki jingthoh pynrem ba bun jait ha ki placard.
Ha kane ka sngi la ïadonlang ruh u Ma Vincent H.Pala MP barim ka jylla, ha ryngkat u Bah Eric Kharsyntiew President jong ka District Congress Committee, Bah G.Ningstar Marthong President ka Nongstoiñ Block Congress Committee, u bah J.T.S Thongni President ka Rambrai Block Congress Committee bad kiwei kiwei, kynthup ïa ki longkmie bad samla jong ka party kiba la wan poi na kylleng ki bynta jong ka District.
Haba ai jingkren hakhmat ïew Nongstoiñ u Ma Vincent H.Pala u la ong, “Ka jingsynshar ka BJP ka wanrah jingma kaba khraw ha baroh ki liang bad shibun ki kynrum kynram kumba phi la ïohi hi na ka por sha ka por. Mynta ka pynkhreh ban wanrah sa ïa ki aiñ kiba ap ka jingma ïa ngi khamtam ki Khristan bad wat ïa kito ki bym dei Khristan ruh”.
Shuh shuh u la ong, “Mynshwa haba ngi ïohsngew haba ki ong shaphang ka bamsap, ka jingbamsap ka long ha ki tnad kum ka PHE, PWD, kaba mut ba ka bamsap ka long hi ha ki katto katne ki tnad sorkar. Hynrei ha kane ka juk pisa sorkar lei lei lah lut bad la shu shim ram, kata lada dei ha central ne state ruh. Ka ram kumba long mynta ka poi 24 hajar klur kumta ka long kaei kaba ma bha”.
“Kine naduh ka BJP lane wat ka NPP ruh kim ju kren re ïa kaei kaba long mynta hynrei ki kren beit ïa ka por ka Congress da ki jingther jingkynnoh lai phew jait. Hynrei mynta lei haba lah lut ka pisa sorkar la sdang lute syndon sa na ki paidbah. Da kit dewiong ne kit rnga ki khrong, lada dei ïa ki nongrep ba wan kit jhur ruh shah kem hap khrong, lada kit shyiap ki khrong. Kaba mut mynta ka spah jong ka sorkar lah lut, ka la sdang ban lute sa na ki briew. Kane ka long kajuh ha Delhi ne ha Meghalaya ruh, dei na kane ka daw ka jingduk ki paidbah ka la poi haduh ñiuhmat ha kine ki sngi”, ong u Ma Pala.
“Mynta ki la sdang ban pynmih sa ki aiñ ïakjakor kiba shyrkhei kiba thmu ban pynduh wat ïa ka hok jinglong laitluid jong ki nongshong shnong ha ka ri, khamtam ïa ki rit paidbah bad ki kynhun Khrsitan. Ka aiñ FCRA ka dei ka thmu ban leh beiñ ïa ki rit paidbah. Hynrei, ngi ieng kum ka Congress halor ban pyrshah ïa kane, tangba na ka bynta ka ri bad ka jaidbynriew donkam ka jingïatylli jong baroh”.
“Ka Congress ka ïeng kumba long mynta namar ka jingshlur ban ïakhun pyrshah, kiwei kiwei ki shu sngap bad shu ai jem ïa ka BJP ba kan shu leh donbor katba mon namar ba kiwei baroh ki don ka jingïadei bad ka BJP. Nga kyntu sha baroh ba ngin shimkhia bad ban buh ha ki jingduwai, khnang ba ngin lah ban ïaid shakhmat ha ki jingïakhih jong ngi”.
“Ki jingïakhih jong ngi kam dei tang ha Nongstoiñ, hynrei kylleng ka Jylla bad ka ri India hi baroh kawei. Ngim shym ïakhih tang ha surok hynrei ha Parliament bad ngi la pynkhreh ban leit sha ïingbishar ruh na ka bynta kane. Namar kata ngi dei ban sngewthuh ba lada long sa kumno kumno ruh dei tang ka Congress, ka party kaba peit shisha ïa ki duk ki jynjar bad ïa ki rit paid kiba don ha ka ri”, u la ong.