Kyntait u President ka UDP ïa ka jingkynnoh u President ka Congress ïa ka Sorkar MDA

Shillong, Nailar 12 : U President ka UDP u Bah Metbah Lyngdoh ha ka sngi Ba-ar, ula kyntait ia ka jingkynnoh u President ka Meghalaya Pradesh Congress Committee (MPCC) u Bah Vincent H Pala ba ka Sorkar MDA kan sa kyrshan ïa ka amendment jong ka Foreign Contribution Regulation Act (FCRA) ha Parliament.
Haba kynthoh ïa ka jingkren u Bah Pala ba pynlong sohpdung ïa u MP ka NPP James K Sangma, u Bah Metbah ula ong ba ki nongïalam ka Jylla kila dep pynpaw ïa ki jingsngewkhia hakhmat u Myntri kam Pohïing u Amit Shah.
“Ngam kubur da lei lei ruh ia katei ka jingkynnoh u ma Pala namar U Myntri Rangbah da lade ula ïakynduh ïa u Amit Shah. Ha ryngkat kiwei ki nongïalam ka Jylla, ula ïalam ïa ka kynhun ki Nongialam Niam bad pyntip ïa u Myntri kam Pohïing ïa kiei kiei kiba donkam haba ïadei bad ka amendment bill” ula ong.
Haba kylli la ka UDP kan kyntu ban khot ïa ka jingïalang ka MDA ban shim lang ïa kajuh ka nongrim pyrshah ïa ka Bill, u Bah Metbah ula ong ba kane kam donkam satia.