Balei kiar ki briew ba don ïa u khniang HIV ban mih shakhmat ban shah sumar

Shillong, Nailar 12 : U Myntri ka tnat ka Koit ka Khiah ka sorkar jylla, Bah Wailadmiki Shylla, u la ong ba ka Sorkar jylla ka la pynkhreh ïa ka plan kaba san snem ban pynkhlaiñ ïa ki lad jingsumar bad jingïarap ïa ki briew kiba im bad u khniang HIV, khamtam ha ki thaiñ nongkyndong.
Haba kren bad ki lad pathai khubor hadien ka prokram jong ka tnad, u Myntri u la ong ba ha ka por ba la dep, ka sorkar ka la ïoh jingujor ba ki ART centre ki dang duna, khamtam ha ki thaiñ nongkyndong. Namarkata, lyngba kane ka plan kaba san snem, ka thong ka long ban pynbun ïa ki ART centre bad ki centre ban test ïa u khniang HIV.
Katkum ka jingong jong u, ka sorkar ka dang don mynta ha ka jingïakren bad ki briew kiba im bad HIV, khnang ban tip ïa ki daw kiba pynsangeh ïa ki ban wan shakhmat ban ïoh jingsumar.
U la kdew ba ka jingsyier ïoh shah peitkhmat ka dang long kawei na ki jingeh kiba khraw. Kawei pat ka long ka jingkhuslai halor ka jinglong ban buhrieh ban kiar ban tip paidbah.
“Katkum ka policy, ka sorkar kam lah ban pynpaw paidbah ïa ki jingtip shimet jong ki briew kiba im bad HIV namar baroh ki jingtip ki long kiba buhrieh. Hynrei, namar ka jingpeit khmat kaba jur, dang don bun kiba sheptieng ne shah pynshlur ban ym wan shakhmat,” u la ong.
Ha kajuh ka por pat u la ong, “Ngi ai khublei ruh ïa ka Kynhun Myntri namar ba ka la mynjur ïa kane ka plan treikam kaba san snem, bad shen yn pynlong ruh ïa ka jingpynshai paidbah ban pynsngewthuh paidbah shaphang u khniang HIV,” u la ong.
U la ban jur ba ka jingpynbun ïa ki ART bad ki centre jingsumar kan ym myntoi lada ki briew kim wan shakhmat ban test bad ban ïoh jingsumar.
Namarkata u la ong. “Ka sorkar kan pynkhlaiñ ruh ïa ka IEC campaign, khnang ban pynsngewthuh paidbah shaphang ka HIV, ki lad test bad jingsumar.” U Myntri u la ong ruh ba ka sorkar ka don mynta ïa ka pisa kaba biang ban pyntreikam ïa kine ki kam, bad yn pynkhlaiñ lang ïa ki centre testing bad treatment.
Ha kajuh ka por u la pynshai ba ym lah ban ong ba don ka jingduna ïa ki doktor na ka bynta ban sumar ïa kiba ïoh ïa u khniang HIV, namar na ka bynta ka HIV testing ym donkam kyrpang ïa ki doktor.
U la ong ba ki tiar sumar ki la biang, bad lyngba ka plan kaba san snem yn lah ruh ban pynbun ïa ka jingdon ki nongtrei. Hynrei, u la pynthikna ba ka jylla hi baroh kawei ka dang don jingduna doktor, hynrei kane kam dei ka jingduna kyrpang na ka bynta ka HIV.
Ha kajuh ka por u Myntri u la pynkynmaw ruh ba ym dei tang ki MLA kiba don bynta, hynrei uwei pa uwei u briew u dei ban shim ïa ka bynta ban ïakhun pyrshah ïa ka jingeh kaba ïadei bad HIV.
U la ong ba lada ym lah ban pdiang bad kyrshan ïa ki briew kiba im bad HIV, kine ki jingeh kin dang ïai bteng.