Nongpoh, Naitung 25: Kum ka shi bynta na ka thong jong ka ‘Azadi Ka Amrit Mohotsav’ kaba dei ka jingmynmmaw burom ïa ka jingdap 75 snem ka ri India naduh ba ka la ioh la ka jong ka riti synshar hapoh ka ri bad ban synshar laitluid khlem da don shuh kano kano ka jingshah teh mraw, ka Ministry ka tnad bording ryngkat ka NEEPCO lem bad ka bor synshar District na Ri Bhoi mynta ka sngi ki la rakhe ïa kata ka ‘Ujjwal Bharat, Ujjwal Bharvishya’ kaba kawei na ka thong jong ka sorkar India ban dang pynkhlaiñ ïa ka kam pynmih bording hapoh ka ri.
Ïa kane ka prokram la pynlong ha Auditorium Hall ka Umsning Town Dorbar ha kaba la wan ban shim bynta naduh u Abhishek Kumar, DJM ka NEEPCO, ka Kong V.A Hynniewta, Additional Deputy Commissioner ka Ri Bhoi, u Bah Rocky Kylla, Chairman ka Umsning Town Dorbar, u Bah Rocky Marwein, Rangbah Shnong ka Umsning Proper B, ka Kong A. Majaw, SE, MePDCL bad kynthup ki paidbah nongshong shnong ka thaiñ Umsning.
Kum ban pynpaw, ka Bijli Mohotsav lane ka Ujjwal Bharat, Ujjwal Bharvishya la pyndonkam kum ka rynsan ban rakhe hadpeng ka sorkar jylla bad ka sorkar kmie bad kumjuh ruh ban pynpaw halor shibun ki kam ba ka sorkar ka la jop kiba ïa dei bad ka kam pynmih bording hapoh ka jylla bad ka ri.
Ha kane ka sngi la pynpaw ruh halor shibun ki kam ba la jop da ka Ministry ka tnad bording kum ka jinglah ban pynmih bun ïa ka bording ilektrik na ka 2,48,554 MW ha u snem 2014 sha ka 4,00,000 NW kumba lng haduh kine ki sngi.
La pynpaw ruh halor ki mat treikam ka tnad power ding ka sorkar kmie naduh ka jingpynmih bording haduh ka jingpynpoi bording sha man la ki shnong bad ki longing jong ka ri, kadei katkum ka thong jong ka sorkar kmie.
Shuh shuh, ha kane kasngi la pyni paidbah ruh da ki dur ki dar bad ki rumom treikam ka tnad bording ka sorkar kmie ba ka thong ka long ban pynbiang ïa ka bording katkum ka jingdonkam ki paidbah bad kumjuh ruh kiwei kiwei ki kam ba ka la jop kumba la buh thong da ka sorkar kmie.
