Kitbok ka Umdihar Presbyterian Secondary School ïa ki khynnah ba leit mihkhmat ïa ka District sha ka State Level Subroto Cup
Nongpoh, Naitung 25 : Kum ka jingkitbok kitrwiang bad ka jingkyrkhu kyrdoh ïa ka kynhun jong ka skul kaba la ioh ban leit mih khmat ïa ka Ri Bhoi District sha ka State Level Suboroto Cup, ki bor pynïaid ka skul Umdihar Presbyterian Secondary School lem bad ka bor shnong mynta ka sngi ki la pynlong da ka jingïalang hapoh ka skul na ka bynta ban ai ka jingkitbok kitriang ïa katei ka kynhun jong ka skul ba kan lah ban wan rah ïa ka jingjop na katei ka lympung ka ban long ha Nongbah Shillong.
Ïa kane ka jingïalang ai khublie kitbok kitrwiang ïa katei ka kynhun jong ka skul la pynlong ha ka Hall jong ka Umdihar Presbyterian Secondary School, Umdihar, haka ba la don bynta naduh ki khynnah skul, ki nonghikai bad kitei ki kynhun ki ban mihkhmat ïa ka District sha ka state level Subroto cup.
Ha kane ka sngi la don ryngkat ruh naduh u President ba rangbah ka Ri Bhoi Youth Federation, u Bah Bipul Thangkhiew kum u kongsan ban ai ka jingkhublei kitbok kitrwiang ïa katei ka kynhun, ka Principal katei ka skul, ka Kong J. Warjri, u Rangbah Shnong, u Bah Romel Lyngdoh, u Bah R.B Shadap, Secretary ka SMC, bad kynthup kiwei kiwei ki nongïalam ha kaba ïa ka jingïalang la pynïaid da u Bah O. Lyngdoh, President ka School Managing Committee.
Ha kane ka sngi na ka liang ka Shnong ka la noh synñiang ruh T. 10000 sha katei ka kynhun bad kumjuh ruh na ka liang ka RBYF ka la noh synñiang T. 10000 kum ka jingkyrshan ïa katei ka kynhun halor shibun ki jingdonkam ba ka kynhun ka donkam haba leit ban ai aireng sha katei ka lympung Subroto cup ha Nongbah Shillong.
Haba ai jingkren ha kane ka sngi, naduh u President ba rangbah ka Ri Bhoi Youth Federation, u Bah Bipul Thangkhiew, u Rangbah Shnong ka Shnong Umdihar ki la pynpaw ka jingkmen ba kane ka skul ka la ioh lad ban leit mihkhmat ïa ka District sha ka State Level Subroto Cup ban long ha Nongbah Shillong bad kum ki nongïalam ki la kyntu ruh ïa kine ki samla ba kin don ka akor ka burom bad kumjuh ruh ban trei shitom na ka bynta ban wan rah nam rah burom ïa ka skul bad ka District hi baroh kawei.