Dei ka Liang Pyrshah ba thad ïa ka sorkar MDA da kaba pyndonkam da ka kyrteng ‘Modi Meghalaya’ : BJP

Shillong, Naitung 24 : U President ka BJP ha kane ka jylla u bah Earnest Mawrie u la kynnoh ba ka dei ka Liang Pyrshah kaba pyndonkam da ka kyntien “Modi Meghalaya” ban thad ïa ka sorkar Meghayala Democratic Alliance (MDA) ba la ïalam da ka National People’s Party (NPP) .
U la ong ba ki don bun ki jingkynnoh ha ki lad pathai khubor ba ka BJP ka leh ïaki kam pyrshah ïa ka sorkar MDA da kaba pyndonkam da ka kyntien Modi Meghalaya hynrei kane kam long kaba shisha satia namar ïa kane ka kam la leh da ka Liang Pyrshah.
“ Ym dei ka BJP kaba pathai ïa ki dur bad video ha ki social media, ha ka jingshisha ngi la pyntip ïa kane sha ka tnad Information Technology (IT) jongka party ha Delhi bad mynta ki la lap ba ki don ki seng saiñ pyrthei kiba donkti halor kane ïa kaba ngin sa sei madan ha ka por bad ka ïa kaba biang” ong u bah Mawrie.
U la ong ba ka dang kloi than ban pynpaw ïa ki kyrteng jong kita ki seng saiñ hima kiba donkti tangba la thikna ba ka dei ka kam buit poh jong ka Liang Pyrshah.
“ Ngi la lap dien mano ba leh ïa kane bad ngi dang ap mynta ïa ka kaiphod na Delhi namar ki la tip mano ba donkti bad naei ka sdang ruh” ong biang u bah Mawrie.
U bah Mawrie u la ong ba kine ki seng saiñ pyrthei ki dei kiba thmu ban pynsynjor ïa ka sorkar MDA namar ka BJP ka dei kawei kaba ïadon bynta lang ha kane ka sorkar.
U la ong ruh ba ka BJP ha kawei pat ka liang kam lah ban shah ïa ki kam bamsap bamphong. “ Haduh mynta ngi ieng beit haka nongrim ban ïaleh pyrshah ïa ki kam bamsap lada ki don ne ki dei shisha” pynkut u bah Mawrie.