Ha Shillong ong u Vice President ka Ri -Ka jingmane Blei ba laitluid ka mut ka jingburom ïa baroh ki jingngeit

Shillong, Nailur 07 : U Vice President jong ka Ri India, u CP Radhakrishnan ha ka sngi Nyngkong u la ong ba ka jingmane blei laitluid ha India ka mut ban burom ïa ka jingngeit bad ka rukom mane jong baroh.
Ïa kane u la kren ha ka jingïalang kaba heh bha ha Shillong kaba long ha Soso Tham Auditorium, Shillong, ban buh maw nongrim na ka bynta san tylli ki projek kiba kot baroh sha ka 1,010.95 klur tyngka.
Mar ïa sdang ka jingkren, u Vice President u la duwai ïa U Khrit u Trai (Lord Christ) ban kyrkhu ïa baroh.
U Radhakrishnan u la ong ba watla ki briew ki don ki rukom mane bad ki jingngeit bapher bapher, hynrei ki dei ban im lang bad burom markylliang ïa ka jingngeit jong kiwei.
“U Blei u long tang uwei, hynrei baroh ki don ka hok ban mane katkum ka jingngeit jong ki. Kane, u la ong, ka dei ka jingmut jong ka jingmane laitluid,” u la ong.
U Vice President u la pynpaw ïa ka jingsngewkmen ban wan sha Meghalaya, kaba dei ka jingwan jngoh kaba nyngkong eh jong u sha ka jylla naduh ba u la shimti ïa ka kam.
U la ai khublei ïa ki paidbah Meghalaya bad ïa ka Sorkar Meghalaya hapoh ka jingïalam jong u Myntri Rangbah Conrad K Sangma, bad u kular ban ai ka jingkyrshan kaba pura na ka bynta ka roi ka par jong ka jylla.
U Radhakrishnan u la ong ba Meghalaya ka pawnam namar ka jingitynnad jong ka mariang, ka kolshor bad ki riti dustur, kiba pyni ruh ïa ka jingïapher bad ka jingriewspah jong ka India.
U la ai jingïaroh ïa ka jylla halor ka jingkiew shaphrang ha ki bynta kum ka koit ka khiah, ka pule puthi bad ka jingpynkhlaiñ ïa ki kynthei lyngba ki Self-Help Group.
U la pynkynmaw ruh ba ka Sorkar India ka buh ïa ka thong jong ka Viksit Bharat ha u snem 2047, bad u la pynpaw ïa ka jingkyrmen ba Meghalaya kan nang kiew shaphrang bad ïashim bynta ha ka roi ka pa jong ka ri.