Ka bai kali bad uniform ki nongñiah kali kamai ka mat ba u DGP un khot ïakren bad u DTO

Shillong, Naitung 24: U Director General og Police(DGP) ka jylla u Dr LR Bishnoi ha ka sngi Saitjaiñ u la kular ha ka jingïakren bad ki longkmie ha ka jingleit jngoh jong u ïa ka Madanryting bad ka Them Basuk ba un ïakren bad u District Transport Officer (DTO) jong ka East Khasi Hills halor ka jingkyrpad jong ki ba un tuklar lem ïa ka jingshim kabu ki katto katne ki nongñiah kali ïa ka bai kali. U DGP u la pynpaw ruh ïa ka jingangnud ba ki nongñiah kali kamai kin phong da ki uniform ha nongbha Shillong.
U DGP ha ka jingleit jngoh jong u ïa kine ki shnong u la ïakren ruh ha shilynter lynti ïa ki paidbah kiba u ïa kynduh ban kylli pyrthew ïa ka jingeh kaba ki ïakynduh bad ïa kaei kaba ki khmih lynti na ki puit ba kin leh. Ha kane ka jingleit jngoh bad ka jingïakren shi kynhun ki longkmie kiba u DGP u la ïoh ban ïakren, ki la kyrpad ba un shim khia lem ban tuklar halor ka jingshim kabu ki katto katne ki nongñiah kali bad ka jingbym ryntih ka rukom buh dor bai kali ha Shillong. Na ka liang u DGP u la kular ba shen un sa khot ïakren bad u DTO ban ïakren halor kane ka jingujor jong ki bad ban wad ki lad ki lynti ba ka bai kali kan long ryntih.
U DGP u la pynpaw ruh ha ka jingïakren bad ki long kmie ba ha ka jingïalang kaba ka ophis jong u kan khot ban ïatai bad ka ophis u DTO un ïakren ba ka ophis u DTO kan pyrkhat ban buh noh da ki uniform na bynta ki nongñiah kali kamai khnang ba ki paidbah kin ithuh shai uno u nongñiah kali kamai bad uno pat u bym di bad ba kan long ruh ka jingshngain na bynta jong ki nongleit nongwan bad ïa ki nongñiah ruh.
U DGP u la ïathuh ruh ba na ka liang jong u shen un khot ïa ka jingïalang bad baroh ki nongñiah kali kamai ha nongbah Shillong ban ïa phylliew jingmut ha kiba bun ki mat khamtam eh ban pan jingïatreilang na bynta ban ïakhun pyrshah ïa u drok uba la jyllei bha ha ka jylla.