Hapoh 7 sngi dei ban pynpra noh ïa ka ophis CBI ha Mawdiangdiang kaba la shna be-aiñ: KSU

Shillong, Nailar 03: Ka khasi students’ union hadien ba ka lah dep ban ïakynduh bad u director ka land and Revenue dept ka lah ïoh jingpynshai ba na ka liang jong kane ka dept kam don bynta eiei ban ai jaka ïa ka CBI ha Mawdiangdiang bad ïa kane ka kam baroh lah leh da ka Urban affairs Shillong.
Mar mar ha kane kajuh ka sngi ka Khasi Students’ Union Shillong Mihngi Circle ka lah leit pat ban ïa kynduh sa ïa u director ka Urban Affairs , bad hadien ka jingïakren bad u, u lah batai ba ïa ka jaka na bynta ka CBI lah ai da ka Urban Affairs ban shna tang ïa ka ophis bad ka residential complex kumta ka seng ka lah buh jingkylli halor kata ka blue print jong kane ka ophis ba hato ka don mo ka jingai jingbit ban shna ïa kane ka temple hapoh kane ka jaka sorkar.
U director u lah kular ban leit jngoh hi ïa kane ka jaka bad ka seng ka lah dawa ba u dei ban pynshai ïa ka seng hapoh 7 sngi ka seng ka lah ban ruh ba dei ban pynpra ïa katei ka jingtei beaiñ kumba ka ju pynra ïa kino kino ki jingtei beaiñ jongno jongno ruh, ka seng ka lah kren shai ba lada kane ka ophis kam leh eiei kam banse ban shim ïa ki aiñ ha la ki jong ki kti, ka phah ruh ïa ka kyrwoh sha baroh ki ophis treikam jong ka sorkar kmie ba kim dei ban wan mushlia bad leh donbor hapoh u pud u sam jong ka Bri u Hynñiewtrep, ong ka kyrwoh ba la phah da u Samla Samuel Kharbani General secretary.
Ha kawei pat ka liang ka Khasi Students’ Union (KSU), Education Cell, Central Executive Council (CEC), hapoh ka jingïalam u Samla Alerick Kharjana, Education Secretary, ka pynpaw ïa ka jingsngewkmen halor ka jingjop kaba ka Seng ka la ïoh hadien ka jingleit ïakynduh bad ki bor pynïaid jong ka National Institute of Technology (NIT), Meghalaya, halor ki mat kiba ktah ïa ka bha ka miat bad ka hok jong ki samla pule.
Ka Seng ka la shimkhia ïa ki jingujor na ki samla pule ka NIT Meghalaya hadien ba ka la pynbor ïa ki ban soi ïa ka Undertaking/Declaration Form kaba khang ïa ki ban seng ne kino kino ki Students’ Body, bad ruh ba la pynsngew ba ka attendance kam dei ban duna na ka 100%. Ka Seng ka la shem ba kine ki kyndon ki long kiba khlem nongrim, kiba pynkheiñ ïa ka jinglaitluid bad ka hok jong ki samla pule.
Ha ka jingïakynduh bad ki bor pynïaid jong ka NIT, ka KSU ka la pynrem jur ïa kine ki rukom treikam bad ka la maham ba dei ban wengnoh mardor ïa ka Undertaking hapoh shi taïew, bad ban pynbeit ruh ïa ka polisi jong ka attendance katkum ki Academic Regulations.
Hadien san sngi, ki bor pynïaid jong ka NIT Meghalaya ki la phah ïa ka jubab paidbah sha ka Seng, kaba pynshisha ba ka attendance ba dei ban bud ka long tang 75%, ym ka 100% kumba la kynnoh.
La pynduh noh ïa ka rukom shim Undertaking/Declaration Form naduh ka Academic Session 2026-27, bad ym shym la shim shuh na ki samla pule kiba rung naduh kane ka samoi pule.
Ka NIT ka la pyntip ruh ba kan pynkhlaiñ ïa ka Student Grievance Redressal Mechanism bad kan wanrah ïa ka Online Grievance Portal ban pynsuk ïa ki samla pule ban phah ïa ki jingujor jong ki.
Ka KSU ka sngew ba kane ka dei ka jingjop jong baroh ki samla pule, bad ka pyni ba haba ka sur jong ki samla ka mih paidbah bad da ka nongrim kaba dei, lah ban pynkylla ïa ki polisi kiba ktah ïa ka jingbit jingbiang jong ki.
Ka Seng ka ai khublei ïa baroh ki samla pule kiba la pynpaw ïa ki jingeh jong ki bad kiba la buh ka jingshaniah ha ka KSU. Ka Seng ka pynskhem ruh ba kan ïai bteng ban ïeng skhem ban ïada ïa ka hok, ka jingmyntoi bad ka lawei jong baroh ki samla pule ka jylla.