Hukum ka ïingbishar HC ïa ka DGP ban mana bymbit pathai khubor ki bym dei pulit hapoh ki Police Station

Shillong, Nailar 3 : Ka ïing Bishar High Court jongka jylla ka la hukum ïa ka Director General of Police ban pynmih ïa ka jingmana ba ym bit ban don kino kino ki kynhun, ki seng saiñ pyrthei ne ki bym dei ki Pulit ban kren sha ki lad pahtai khubor hapoh kino kino ki Police Station ne phatok jong ka jylla.
Ka Division Bench jongka Chief Justice Revati Mohite Dere bad u Justice W Diengdoh ka la pynmih ïa kane ka hukum mynta ka Lah Sngi U Blei hadien ba la shong bishar ïa ka WP (C) No 350/2026 ba la ujor da ka Bar Association jongka ïing Bishar High Court jongka jylla hi.
Ka ïing Bishar ka la shong bishar ïa kane ka kam halor ka jingshah ktah kti jong uwei u Nongïasaid Aiñ ha ki dkhot ka HNYF halor ka jingleh kynshleiñ jongu ïa kawei ka samla kynthei ba wan pyntbit ha u. Haba kohnguh ïa ka hukum jongka ing Bishar u SP ka East Khasi Hills u bah Vivek Syiem u la ai ïa ka jingjubab (affidavit) ha ka 2 tark Nailar 2026 bad leit mih rh da la ka jong ka met hakhmat ka ïing bishar.
Kat kum ka affidavit ki Pulit bala pynrung ha ka jingthoh, ïa ka ejehar la register ha Sadar Police Station ha ka 31 tarik Naitung kum ka case No. 275(07)/2026 pyrshah ïa ki dkhot ka HNYF hapoh ki kyndon bapher bapher ka BNS.
Saw ngut ki briew kila shah kem bad ka jingtohkit mynta ka la ïaid shakhmat.
Ka affidavit ka la ai ruh hakhmat ka ïing Bishar ïa ka kaiphod medical examination ba dei bad ka jing shah shoh u nongïasaid aiñ kaba la leh ha Shillong Civil Hospital.
Ka kaiphod ka pyntip ba une u nongïasaid aiñ ula don dak mynsaw na ki bynta jong ka ngap ka diang bad ka jingat ka shyntur, jingud ba pang ka khohsiew ka mon bad ka jingdon hapdeng ka jingbym tip briew hapdeng 5 haduh 10 minit.
Haba shimkhia ba ka kynhun ka la ai jingkren sha ki lad pathai khubor ha phyllaw ka Police Station, u SP ula pyntip ïa ka ïing Bishar ba ula pynmih ïa ka jingmaham ba khang pyrshah ïa kane.
Namar kane ka ïing Bishar kala bthah : “Ngi khmih lynti ba ka DGP ka Jylla kan pynmih ruh ïa kum kane ka jingbthah lane ka hukum ba la don lypa sha baroh ki Police Station, khnang ban pynthikna ba ym dei ban pyndonkam ïa ki Police Station ne phatok kum ki jaka kren lad pathai khubor da kino kino ki seng saiñ pyrthei,sengbhalang bad kiwei kiwei lait na ki Pulit”.
Ka ïing Bishar ka la bthah ïa u Investigating Officer ka Sadar PS Case Nos. 275(07)/2026 bad 265(07)/2026 ba un wan mih beit ha ïing Bishar ryngkat ki kot ki sla jong kane ka case ha ka sien bishar ban wan.
Ka la pan ruh ïa ka affidavit na ka Jylla halor ka jingpyntreikam ïa ka jingbthah ka Supreme Court ha ka Tehseen S. Poonawalla case.ïa kane ka kam la buh ban bishar biang ha ka 19 tarik Nailar, 2026.