Ka MSCPB kam ju don nongshun ka trei la kajong ka kam ong u Secretary hadien ba shah kawang petrol bom

Shillong, Nailar 3 : U Member Secretary ka Meghalaya State Pollution Control Board (MSPCB) Bah GH Chyrmang ha ka Lah Sngi U Blei ula ong ba ka Board kam pat ju don jingïashun bad no bad no ruh bad ka ïai trei bad pyndep la ka jongka kamram.
Une u Heh ka MSPCB ula pynpaw ïa kane tang da ki kynta hadien ka jingshah kawang petrol bomb ka Ophis ha ki arngut ki samla ba tap durkhmat hynne ka sngi.
Haba ïakren bad ki nongthoh khubor, u Bah Chyrmang ula ong ba ki nongtrei ki la pyntip sha u ïa kane ka jingjia katba u dang don ha lynti sha Byrnihat ban leit jurip.
“Katba nga dang don ha lynti ban leit jurip sha Byrnihat, Nga la ïoh pdiang ïa ka phone call na ka Ophis ba ka la don kane ka jingjia ba sngewsih-ba ki runar bym lah ban tip ki la kawang petrol bomb ïa ka Ophis” ula ong.
U Bah Chyrmang u pyntip ba mar mar hi ula wan phai noh sha Ophis bad bynrap ba katto katne na ki nongtrei kila ïohi ïa kine ki nongkawang petrol bom hynrei kim shym la lah ban pynithuh ia ki namar ba kila tap durkhmat.
“Ki video CCTV ki pyni ba ki don arngut ki briew, hynrei ïa ki durkhmat jong ki la tap noh. Ngi la dep ban ujor ïa ka ejahar ha Laitumkhrah Police Station” ula ong.
Kat kum ka jingtohkit bala ïoh lum da ka Board, ki don arngut ki briew ba suba, kiba la wan da la ki jong ki scooty bad arngut ki la wan rung sha phyllaw ka ophis.
“Kat kum ka khubor ba ngi ïohi, kine ki briew kila wan da artylli ki scooty. Arngut kila wan rung sha phyllaw. Ngam lah ban ong eiei palat ïa kata namar ka jingtohkit ka dang ïaid. Ngim don jingïashun badno badno ruh, kumta ngam tip lada ka don ne em ka jingïadei bad kano kano ka jingjia” ong u Bah Chyrmang.
Ula pyntikna ba ym shym la don mano mano ruh ba mynsaw ha kane ka jingwan thombor.
“Ia uwei u petrol bom la kawang marjan ka kamra treikam u Senior Scientific Assistant-donbok u khlem lei lei satia” ula ong.
Une u Member Secretary ula buh jingkylli ïa ka daw ha lynti kane ka jingpynlong sohpdung ïa ka MSPCB.
“Balei ba pynlong sohpdung ïa ka Ophis jong ngi? Ngi dei tang ki nongtrei kiba trei jar jar, ngim shym la leh eiei” ula ong.
Ki Pulit bad ka kynhun Forensic ki la leit sha katei ka jaka bad ki la lum ïa ki sakhi sabut. ïa ka ejahar la ujor ha Laitumkhrah Police Station bad ka jingtohkit mynta ka la ïaid shakhmat.