Ki paidbah ki jied ïa ki Nongmihkhmat ban ïasaid na ka bynta jong ki ym ban ïalam ne kyntur da u paidbah sha Secretariat

Shillong, Nailar 03 : U Symbud Myntri Rangbah ka jylla u Ma Sniawbhalang Dhar ha ka Lah Sngi U Blei, ula ong ba kum ki Nongmihkhmat ba la jied da u paidbah ka dei ka kamram jongki ban ïasaid ne ïakren halor ki Mat ki jura ne ki ishu kiba dei na ka bynta ka ri bad ka jaidbynriew. Namar ki paidbah ki la jied khnang ïa ki ban mihkhmat bad long u nongïalam jongki ym shuh dang ïalam ne ïawer da ki paidbah halor kino kino ki mat ban ïatur sha Secretariat.
U la ong “ Lada nga kum u Nongmihkhmat ki paidbah ka Nartiang Constituency nga hap ban ïalam da ki paidbah ban ïatur sha secretariat halor kino kino ki mat kata ka mut ngam pat long tbit ban long kum u nongmihkhmat jongki namar ki la jied ïa nga ban ïasaid na ka bynta jongki bad lada donkam eh ban ïalam ruh tang ki nongïalam ba hakhmat ban ïa kynduh ia u Myntri Rangbah ne ïa kino kino ki Myntri Sorkar ym ban ïalam da ki paidbah”.
Halor ka jingpynbna jongka VPP ban ïalam paidbah sha Secretariat u la ong ka sorkar MDA ka dei ka sorkar kaba kloi ban ïakren sngewthuh halor kino kino ki mat kiba ktah ïa ka ri bad ka jaidbynriew. Kumta ka jingkhang jong ka Sorkar ka plie ym tang ïa ka VPP hynrei ïa baroh ki seng saiñ pyrthei haba kyntu ia ki nongmih khmat paidbah ba kim dei shuh ban ïawer kyntur ïa u paidbah ban ïakhih namar la jied ïa ki ba kin kren ïa ki jingeh u paidbah beit beit bad ka Sorkar. “ Lada ngi wer ïa ki paidbah ban ïatur sha Secretariat ym tang ba ngi pynbijai ei ïa ka por jongki hynrei ka pynthut ïa ka leit ka wan jong kiwei ki nongleit nongwan” ong u ma Sniawbha.
Haba kynthoh ïa ka jingthmu ïaid paidbah ka Voice of the People Party (VPP) sha Secretariat la 6 tarik Nailar, u Ma Sniawbha ula ong ba ka jingïakren ka dei ka lynti kaba biang eh ban weng ïa ki jingeh.
“Ha ka jingshisha, kam donkam ïa ki (VPP) ban wan ïatur paidbah. Ki lah ban wan bad aiti ïa ka dorkhas ha ka lynti kaba dei sha u Myntri Rangbah. Ngi lah ban ïakren bad ïasyllok-kane ka dei ka lynti ba kumno ngi pynïaid ïa ka Sorkar” ula ong haba ïakren bad ki nongthoh khubor.
U Symbud Myntri Rangbah ula ban jur ba kum ki nongmihkhmat paidbah ki long laitluid ban ïakynduh ha kano kano ka por ïa ka Sorkar. “Khlem pep, lada don kino kino ki ishu ba kyrkieh na kino kino ki seng saiñ pyrthei, ki don ïa ka hok ban ïakynduh ia u Myntri Rangbah lane ka Sorkar. Ki long kiba la pdiang. Lada ki wan bad buh ïa ki mat lane ki jingeh jong ki, ngin sa ïakren. Kam don jingeh eiei ruh em. Baroh 60 ngut ngi don la ka jong ka jingkitkhlieh lada donkam ngi lah ban ïakren bad ïatai wat hapoh ka ïing Dorbar Thawaiñ jongka jylla ruh lane ha ki Ophis treikam jong u Myntri Rangbah ne kino kino ki Myntri Sorkar ruh.” ula ong.
“Baroh ki MLA bad MDC ki dei ki nongïalam u paidbah. Ki don ïa ka hok ban ïakynduh ïa u Myntri Rangbah bad ka Sorkar, bad ka jingkhang ka long kaba plie beit ïa ki baroh 24 kynta” bynrap u Bah Sniawbha.
Ula pynpaw ba ka Sorkar kan pdiang ïa ka VPP sha ka jingïakren watla ka wan tang khyndiat ngut ki briew ruh. “Ngin pdiang beit ïa ki wat lada ki wan tang 3 ne 5 ngut ki nongïalam, kumba ngi ju leh bad kino kino ki kynhun ba ïakhih, Lada wan mano mano ruh, ngi long kiba pdiang ïa ki. Ai ba u CM un pynbeit” ula ong.
U Ma Sniawbha ula buh jingkylli ïa ki nongrim ha lyndet ka jingkhot ia u paidbah ban ïakhih halor ki ishu kiba lah ban ïakren ha ki jingïalang. “Lada dei ka ishu ba rit ba ria ruh, ka mut ngi hap ban khot ïa u paidbah ban ïatur sha Secretariat- kaei ka jingmut ba ki paidbah ki jied ïa ngi?. Ngi la shah jied ha u paidbah ban mihkhmat na ka bynta ka jingeh jong ki. ïa ki ishu barit, lada ngi khot ïa u paidbah ban ïamih bad ïatur sha Secretariat, kane kam dei satia ka lynti” ula ong.
“Ka dei ka kamram jong nga kum u MLA ban ïakynduh ïa ka Sorkar ban ïakren ïa ki jingeh jong ka constituency jong nga ne jongka ri bad ka jaidbynriew” ong u Bah Sniawbha.
Ula pynpaw ruh ba bun na ki ishu bala pynpaw da ka VPP ki dei kiba la don hapoh ka jingïakren bad ka Sorkar kala kut jingmut ban pynbeit ïa ki na ka bynta ka bha kamiat jong u paidbah.