Mawkyrwat, Naitung 30 : Ka ophis jong u Executive Engineer, PHE Mawkyrwat Division, ha ka 29 tarik Naitung 2026 ka la pynlong ïa ka Gram Sabha Meeting bad ka Jal Arpan Diwas ha PHE Hall, Mawkyrwat, South West Khasi Hills District. Kane ka Jal Arpan Diwas ka dei ka sngi lehkmen ban pynkupbor ïa ki shnong kum ki trai shnong kiba peit bad sumar ïa ki skhim Jal Jeevan Mission (JJM).
Ka jingpynlong ïa kane ka prokram ka long kum shi bynta ban ai jinghikai bad pynsngewthuh ïa ki dkhot jong ka Village Water & Sanitation Committee (VWSC) bad ki nongïalam shnong halor ki kamram bad ki jingkitkhlieh jong ki, khnang ba kin lah ban pynïaid beit bad pynneh pynsah ïa ki skhim JJM ha ki shnong jong ki.
Haba ai jingkren ha kane ka jingïalang, u Bah K. Nongbsaw, Executive Engineer bad Member Secretary ka District Water Mission, South West Khasi Hills District, u la batai bniah halor ki kyndon, ki kamram bad ki jingkitkhlieh jong ka Village Water & Sanitation Committee (VWSC) ha kaba ïadei bad ka jingïaid beit jong ka Jal Jeevan Mission. U la pynshai ruh halor ka skhim 16th Finance Commission Tied Grant, kaba long ka jingïarap pisa kyrpang ban kyntiew bad pynbha shuh shuh ïa ki jingtei bad ki kam jingïada ïa ka umbam umdih hapoh ki shnong.
Ha kane ka prokram la wan ban ïashim bynta da ki spah ngut ki dkhot ka VWSC bad ki nongïalam shnong na ki shnong bapher bapher jong ka district. Ha kane ka sngi la sam ruh ïa ki syrnod bad ki momento sha 25 tylli ki shnong kiba la ïoh ïa ka jingithuh kum ki Har Ghar Village, kata ki shnong kiba la pynbiang pura ïa ka umbam umdih sha baroh ki longing, kumjuh ruh ha ki skul bad ki Anganwadi Centre.
La pynïaid ïa kane ka jingïalang da u Bah Steven Wahlang, District Project Manager, JJM, South West Khasi Hills District, ha ryngkat ka jingdonlang u Bah E. Khongthiang, SDO (TC), u Bah Tyngshain Lyngkhoi, JE, u Bah P. Myrthong, JE, ryngkat bad ki riewrangbah jong ka thaiñ kiba kynthup ïa u Bah Kitborlang Nongrem, Myntri Shnong Rangthong, u Bah Drus Lyngdoh Tongkhar, Myntri Shnong Rangmaw, bad kiwei pat ki nongïalam shnong.
