SHILLONG, Naitung 30: U Mewan Rasmut u la pynkhihjar san kol marwei ban ïarap ïa ka Lawsohtun SC ban khur suk ïa ka jingjop kaba da 7-0 pyrshah ïa ka Sohiong SC ha kawei na ki jingïakhun jong ka lympung Second Division Football league 2026 ba la pynïaid da ka Shillong Sports Association (SSA) hynne ka sngi Palei ha madan SSA Stadium, Polo.
Ki la don tang ar ngut ki rangïalehkai kiba la pynkhihjar ha kane ka jingïalehkai na ka bynta ka Lawsohtun kaba la lamkhmat lypa ïa ka kylla step da 4 kol lyngba u Pynshngain Marboh (6 & 38’) bad u Mewan Rasmut (42, 45’) kiba la thep mar ar sien ha ka kylla kaba nyngkong.
U Mewan Rasmut u la pyndep ïa ka hat trick ha ka minit kaba 82 shuwa ba un bynrap sa ar tylli ki kol ha ka minit kaba 88 bad 90+3.
Ha kawei pat ka jingïakhun ha MFA Ground, la sakhi ïa ka Sohryngkham SC kaba la wanphai na ka shi kol ban jop da 2-1 kol ïa ka Tynring SC.
Ka Tynring ka la pynkhihjar nyngkong tang ha ka minit kaba 3 lyngba u Marbiang Kharmalki hynrei ka Sohryngkham ka la pynïakhaid noh na u Winstar Kharpran (17’) shuwa ba u Daioniki Kharpran un thep ïa ka namtam (58’).
