Ka jingkiewdor bad duna nongtrei pynkylla noh ïa ki kyndon PM-POSHAN ha Meghalaya: MSWDA

Shillong, Naitung 29 : Ka Meghalaya Schools Welfare Development Association (MSWDA) ka la kyrpad ïa ka Sorkar Pdeng ban pynkylla noh mardor ïa ki kyndon jong ka skhim PM-POSHAN ha Meghalaya, da kaba ong ba ki kyndon kiba don mynta kim shym la kheiñ ïa ka jinglong lum jong ka jylla, ka jingkiew dor jong ki marbam bad ka jingduna ki jingtei ha bun ki skul.
Ha ka dorkhas kaba la phah sha u Union Secretary ka School Education and Literacy lyngba ka tnat Pule Puthi ka jylla ha ka sngi Baar, ka seng kaba mihkhmat ïa ki skul jingïarap bad ki skul ba la ithuh, ka la ong ba ka conversion cost kaba long T.6.78 shi sngi na ka bynta ki khynnah Lower Primary bad T.10.17 na ka bynta ki khynnah Upper Primary kam shym la biang shuh namar ka jingkiew dor jong ki jhur, ki dai, ka umphniang, ka ding shet bad kiwei ki jingdonkam.
Ka MSWDA ka la ong ba hynrei ha Meghalaya, bun ki skul kim lah ban rep jhur ha ki kitchen garden namar ka jingduna jaka bad ka jingbun slap, kumta ki hap ban thied lut ïa ki marbam na ïew.
Ka seng ka la kdew ruh ba ka jingïoh bynta u khaw kam ïahap bad ka jinglut ha ka jingshet. Katkum ka skhim, ki khynnah Lower Primary ki ïoh 100 gram u khaw katba ki Upper Primary ki ïoh 150 gram, hynrei ka jinglut ha ka jingshet ka jan jingïasyriem. Ka la ong ruh ba ki khynnah hi ki la kyrpad ban ai kham bun u khaw khnang ba kin ïoh bam biang ha ka por bam mynstep.
Ka MSWDA ka la pynpaw ruh ba ka honorarium kaba T.2,000 shi bnai ïa ki cook-cum-helpers, kaba la siew tang 10 bnai shi snem, ka long kaba duna eh. Ka la dawa ban kyntiew ïa kane ka pisa bad ban siew baroh 12 bnai.
Ka seng ka la ong ruh ba bun ki skul ki shem jingeh ha ki kam jingïaid paidbah kum ka jingthoh attendance, ka jingpynïaid stock bad ka jingpynkhreh account namar kim don ki nongtrei bym dei nonghikai.
Ha ki skul kiba bun ki khynnah, ki jingeh ki nang jur namar ka jingduna ki nongtrei, ki ïing shet, ki pliang shet bad ki jaka buh marbam. Ka por bam mynstep kaba lyngkot bad ka jingbym don ki kamra bam (dining hall) kiba la tap ruh ka pyneh ïa ka jingsam bam, khamtam ha ka aïom slap.
Kumta ka MSWDA ka la dawa ban ai jingïarap pisa ban tei ïa ki common dining hall khnang ba ki khynnah kin ïoh bam ha ka jaka kaba khuid bad kaba shngaiñ.
Ban pynbeit ïa kine ki jingeh, ka seng ka la ai jingmut ban pynkylla ïa ka conversion cost katkum ka dor ïew, ban pynïaryngkat ïa ka jingïoh bynta u khaw, ban don ki kyndon ba kyrpang na ka bynta ki jylla lum, ban kyntiew ïa ka tulop ki nongshet, ban ai jingïarap ha ki kam ban pynïaid bad ban ai pisa ban shna ïa ki kitchen-cum-store bad dining hall.
Ka MSWDA ka la ong ba lada pynurlong ïa kine ki jingdawa, kan ïarap ban pynthikna ba ki khynnah kin ïoh ïa ka bam kaba paka bad ban pynurlong ïa ki jingthmu jong ka National Food Security Act.