Mynta u snem yn dap 100 snem Kynduh u Lat ka jylla ïa ki khynnah na ka Hindu Mission Children Home

Shillong, Naitung 29: Ki la don haduh 26 ngut ki khynnah na ka Meghalaya Hindu Mission Children Home ki la leit ïakynduh ïa u Lat ka Meghalaya, u CH Vijayashankar, ha Raj Bhavan ha ka Sngi Balang.
Ha kane ka jingïalang, u Lat u la ai mynsiem ïa ki khynnah ba kin bteng ban trei shitom bad ban bud ïa ki jingangnud jong ki da ka jingsngewskhem bad ka jingkut jingmut. U la ai jingïaroh ruh ïa ki seng imlang sahlang kiba trei na ka bynta ka bha ka miat jong ki khynnah bad kiwei kiba donkam jingïarap.
Ha kane ka jingïakynduh, u Lat u la kylli shaphang ka jingkoit jingkhiah, ka pule puthi bad ki jingthmu jong ki khynnah ha ka lawei. U la ai jingïaroh ïa ka Meghalaya Hindu Mission Children Home kaba la ai jingïada, jaka sah bad jingïarap ïa ki khynnah kiba donkam jingïarap bad kaba la noh synniang shibun ha ka jingroi jong ki.
Ka kynhun kaba leit ïakynduh ka kynthup ïa 26 ngut ki khynnah, ryngkat bad u Advocate R. Paul, Assistant In-charge jong ka Institution, ka Anita Deb, Case Worker, u Shekar Mech, Warden bad u KB Prasad Pandey, Nonghikai. Ha kane ka jingïalang la donlang ruh u Additional Chief Secretary jong u Lat, u HC Chaudhary, IFS.
Ka kynhun ka la pyntip ruh sha u Lat ba ka Meghalaya Hindu Mission Children Home, kaba la seng naduh u snem 1926, kan rakhe ïa ka 100 snem jong ka ha u Risaw 2026, bad ki la pan ïa ki kyrkhu kyrdoh jong u halor kane ka jingïaid lynti kaba kyrpang.
Ha kaba kut, u Lat u la kitbok kitrwiang ïa ki khynnah ba kin nang kiew shaphrang ha ka pule puthi bad ha ka jingim jong ki, bad ba kin long ki nongshong shnong kiba kitkhlieh.