Shillong, Naitung 29 : Ka National People’s Party (NPP) ha ka sngi Balang ka la kynnoh ïa ki seng saiñ pyrthei ba ïaleh pyrshah ban pynsaphriang ïa ki khubor lamler halor ki nongrim ka party haba ïadei bad ka Foreign Contribution (Regulation) Amendment Bill, 2026 bad ong ba ka NPP kala dep leit ïakren ne tynruh ïa kane ka kam bad ka Sorkar Pdeng ha ka kyrdan kaba halor eh.
Ha ka kyrwoh, u National Working President ka NPP bad MP ka Rajya Sabha James K Sangma ula ong ba ki jingkam ba ka NPP ka la sngap jar halor kane ka amendment bill ka dei ka bym don nongrim satia.
Ula kynnoh ba ki khubor ki la mih na ki party shim kabu kiba ïaleh pyrshah, kiba tip tang ban hylla bad pynkulmar jingmut khnang ban ïoh jingmyntoi ha ka saiñ hima sima.
Ka NPP ka ong ba dei tang ma ka na ki seng saiñ pyrthei napoh ka thaiñ kaba la leit ban pynpaw ïa ka jingpyrshah hakhmat ka Sorkar Pdeng ban ïada ïa ki Balang bad ki seng niam kiba rit paid.
Haba kdew ïa ki jingïakren ba dang shen, ka NPP ka ong ba u Myntri Rangbah bad National President Conrad K Sangma ula ïalam ïa ka kynhun ki nongïalam niam ban ïakynduh ïa u Myntri kam Pohïing ka Ri u Amit Shah ha New Delhi ha u bnai Naitung 2026.
Ka kynhun ka kynthup ïa ki nongmihkhmat na ka Presbyterian Church of India, North East India Christian Council, Catholic Archdiocese ka Shillong bad Garo Baptist Convention.
Ha ka jingïalang, ka kynhun kala pynsngew bad aiti da ka dorkhast ïa ka jingsngewkhia haba ïadei bad ka kyndon 16A(5) bad kiwei pat ki kyndon pyrrkhing jong ka Draft FCRA Bill hakhmat u Myntri kam Pohïing ka Ri
Ka kynhun kala kyntu ïa ki seng niam kiba pynïaid ïa ki kam pule puthi, ka koit ka khiah bad ka jingshakri ïa ka imlang sahlang ba kim dei ban shah pynthut.
Ka NPP ka pyntip ba u Amit Shah ula kular ba un sa khot ïa ka jingïalang ïa ki kynhun bapher bapher ban ïasyllok ïa kane ka kam.
Ka NPP ka la kdew ruh ïa ka jingïalang ba long ha u bnai Iaiong 2026 hapdeng u Myntri Rangbah, u Symbud Myntri Rangbah Bah Prestone Tynsong bad ki nongmihkhmat na ka Catholic Bishops’ Conference of India lem bad u Myntri ka Sorkar Pdeng Kiren Rijiju.
Ka jingphaikhmat ha katei ka jingïalang ka long ban ïada ïa ki seng niam kiba trei ha ki jaka kyndong bad ki jaka ki riewlum haba kyntu ruh ban ai jingïada na ki kyndon kiba buh jingma ïa ka jingtreikam bad ka jingdon jingem.
