SPL 2026: Da ka said pynliem ka Lajong ïa ka Nangkiew Irat ban khur ïa ki 3 poiñ

Shillong, Naitung 29: Ka Shillong Lajong ka la lah ba kan khur ïa ka jingjop da tang 1-0 pyrshah ïa ka Nangkiew Irat ha ka jingïalehkai kaba 4 jong ka Shillong Premier League 2026 ha madan First Ground-SSA Stadium hynne ka sngi Balang.
Ha ka jingïakhun kaba ar kylla, ka Lajong ka la ïoh ba kan lamkhmat hapoh ki 45 minit ba nyngkong lyngba ka kol ba la thep da u Deibormame Tongper (37’) hynrei ka Nangkiew Irat ka la wanrah ïa ka jingïakhun kaba tyngeh ha ka kylla miet hynrei watla katta ruh, kam shym la ïoh lad satia ban ïaid lait ïa ka kut ba skhem jong ka kynhun liang pyrshah jong ka.
Kane ka dei ka jingïalehkai kaba lai mynta ka samoi ka ban kut da ka jingjop kaba tang 1-0 kol, kaba pynshisha ïa ka jingïakhun kaba nang jur hapdeng ki kynhun ha kane ka SPL 2026.
Kane ka jingïakhun ka la sdang da ka jingpyrshang thep kol kaba la jan rung sa khyndiat jong ka Nangkiew Irat, kaba la wan na u rangïalehkai barim ka SLFC u Maxderidoff Wahlang, uba la pyrshang thep da ka khlieh tang ha ka minit kaba lai.
Naduh katei ka por ka Lajong ka la tehlakam ïa ka jingïalehkai bad ka la ïoh ban pynkhihjar ha ka minit kaba 37. Kane ka kol ka la urlong hadien ba ka Nangkiew Irat kam shym la lah ban pynkiar ïa ka bol corner kick na ka jingma bad u Deibormame u la ïohlad ban pynïasoh da ka kjat jong u ban pynrung jlut ïa ka bol shapoh kol.
Ka jingwanrah ïa u Wallamsuk Nongkhlaw, u Justerwell Tham bad u rangïalehkai ba soi thymmai u Yhoto Lohe ha ka kylla miet ka la pynkhlaiñ ïa ka jingïalehkai jong ka Nangkiew Irat bad ka la ñion khlem shongthait ïa ka Lajong.
U Wallam u la ïoh ar tylli ki kabu ban pynkhihjar ha ki saw minit ba nyngkong jong ka kylla miet, bad u la pynsyrwa ruh ïa ka jingpyrshang thep kol da ka khlieh ha ka minit kaba 56.
Ki la don ruh katto katne ki jingpyrshang thep kol na u Yhoto bad u Justerwell ki bym shym la seisoh na ka bynta ka Nangkiew Irat, kaba jin da ladei ban khur ïa ka jingjop lada kitei ki jingpyrshang ki la urlong.
Ka paw shai ba ka SLFC ka la shu thaw donbok ha kane ka jingïakhun bad u rangap kol jong ka, u Lakpa Lama um shym la mad ïa ka jingïalehkai kaba kyrpang, watla u la lah ban pynkut khlem da shah thep (clean sheet).
U nongap kol u la jan shah thep hadien ba u la shah knieh ïa ka bol hapoh ki 10 minit ba khatduh bad nangta ha ka minit kaba 90 u khlem shym la lah ban tehlakam ïa ka bol pashat na ka corner kick; hynrei donbok ïa ka Lajong ba ka jingpyrshang jong u Yhote kam shym la poi sha ka thong.
Mynta ka sngi yn sakhi ïa ka jingïakhun ba khatduh jong ka Round 1, ha kaba ka Mawlai kan khreh ban ïakhun pyrshah ïa ka Laitkor ha ka por 4 baje janmiet. Ka Mawlai ka la long ka lahduh ha ka SPL ha u snem 2022 bad 2023 bad nangta ka la wan ba-ar ha u snem 2024. Ha u snem ba la dep ka kynhun ka la hiar sha ka kyrdan ba lai bad ki don shibun kiei kiei kiba kane ka kynhun ka donkam ban pynbha khnang ban wanbiang biang sha ka kyrdan ba ha khlieh duh.