Naduh ba ïalam ka NPP ïa ka jingsynshar kut noh ka juk ïaknieh bor ïaknieh shuki hapoh ka jylla

Shillong, Naitung 28 : U Symbud Myntri Rangbah ka jylla, u Bah Sniawbhalang Dhar, u la ong ba ka National People’s Party ka dei ka seng saiñ pyrthei kaba skhem tam ha Meghalaya bad ba ha kine ki palat phra snem ba ka la synshar, kam shym la don kano kano ka jingïakajia na ka bynta ka bor.
“ Na kata ka daw nga nud ban ong ba naduh ba ïalam ka NPP ïa ka jingsynshar hapoh ka jylla kajuk jingïaknieh bor jingïaknieh shuki ka la kut noh namar ka sorkar ka skhem lynter mynta la phra snem”ong u Bah Sniawbha.
U Bah Dhar u la kren ïa kane haba ai jingkren ha ka jingïalap elekshon na ka bynta u kyrtong ka NPP ha ka Shillong Lok Sabha by-election, u Dr. DRL Nonglait, ha Umdihar, Umsning, Ri Bhoi.
Haba ïanujor ïa ka sorkar MDA ba ïalam da ka NPP bad ki sorkar kiba rim, u Bah Sniawbhalang Dhar u la ong ba ka NPP ka la pyni ïa ka jingïatylli bad ka jingskhem ha ka synshar jylla.
U la ong ba ha kine ki palat phra snem, kam shym la don jingïakajia halor ka shuki Myntri Rangbah, Symbud Myntri Rangbah, MP ne President ka party.
“La palat phra snem ngi la synshar ïa ka jylla. Ngim pat ju ïakajia halor ka shuki Myntri Rangbah, Symbud Myntri Rangbah, MP ne President, namar ba ngi la pynleit jingmut tang ha ka kam paidbah.”
U Dhar u la kynmaw ruh ba ha ki por ba la leit, ki jylla ki ju mad ïa ka jingïakylla Myntri Rangbah man la khyndiat bnai ne man la ar snem.
Katba mynta pat, u la ong ba ka Meghalaya ka don ïa ka sorkar kaba skhem tam.
“Kynmaw ba ha ki por ba la leit, ki Myntri Rangbah ki ju kylla man la hynñiew bnai ne man la ar snem. Mynta pat ngi don ïa ka sorkar kaba skhem tam.”
U Symbud Myntri Rangbah u la ong ruh ba ka NPP ka pynleit jingmut ha ka roi ka par bad ka shakri paidbah, ym ha ka jingïakren paidbah ne jingïakynthoh politik.
U la ong ba ki nongïalam ka NPP ki pynlut ïa ka por ban trei na ka bynta ki paidbah bad ym ban jubab ïa man ka jingïakynthoh.
“Ka NPP kam don por ban shong jingïakren ha ïew. Ngi dang trei shitom bad wat ha ka por mynmiet ruh ban pyndep ïa ki kam paidbah. Ngin jubab tang ha kaba donkam bad ngim dei ban pynlut por ïa kito kiba tang ban kren.”
U Bah Dhar u la kyntu ruh ïa ki nongkyrshan bad ki paidbah ba kin kiar na ka jingïakren kaba pynïakhlad bad jingïakynthoh para briew.
U la ong ba ki nongïalam ki dei ban pynneh ïa ka jingïatylli bad jingïa-ieid para briew.
“Ka jingim ka lyngkot. Ngim don ei ei pyrshah ïa uno uno. Ka kam jong ngi ka long ban ieid bad ban pynbeit para briew, ym ban khot nongtuh ïa kiwei. Lada ki nongïalam hi ki kren kumta, shaei ka jylla kan poi?”
Haba pan jingkyrshan ïa u kyrtong ka NPP, u Dr. DRL Nonglait, u Bah Dhar u la ong ba u Nonglait u dei u nongïalam uba rit mynsiem, uba la im ha ki shnong bad uba sngewthuh ïa ki jingeh jong ki paidbah.
U la kyrpad ïa ki nongthep vote ha Umdihar, Umsning bad ha Ri Bhoi baroh kawei ban ai ka jingkyrshan ïa u kyrtong ka NPP.
U la ong ruh ba ka jingïatreilang hapdeng u MP bad ka sorkar jylla bad ka Sorkar Pdeng ka long kaba donkam ban wanrah ïa ka roi ka par.
“Lada u MP u shong ha liang pyrshah, ngi sdang naduh ka bynta kaba duna. Ngi donkam ïa ki nongïalam kiba ïatreilang ha ka jylla bad ha Delhi ban wanrah ïa ka roi ka par. Lada ngi ïapynïakhlad para ma ngi, ma ngi hi kiba rem.”