Yn lum yn lang ka SRKKBH ïa baroh ki kur, ki rangbah shnong ha ka jingïalang ‘Tipkur Tipkha Movement’

Shillong, Naitung 28: Ka Synjuk Ki Rangbah Kur Ka Bri U Hynñiewtrep ka wer ïa baroh ki Rangbahkur ki Wahehkur, ki Rangbah shnong, ki Longsan Mansan shnong jong ka Bri U Hynñiewtrep ba kin ïawan sha ka jingïalang ba la suit la shor “Tipkur Tipkha Movement” ba la pynkhreh ban pynlong ha kylleng ka Ri Khasi Jaiñtia kiba dei hapoh ka iktiar jong ki Dorbar Thawaiñ Dalariti ha Shityllup ka jylla, kynthup ïa ka Khasi Hills Autonomous District Council bad Jaiñtia Hills Autonomous District Council.
Ka jingthmu kaba kongsan ka long ban tehsong ïa ki kur baroh da kaba pynskhem lyngba ki Seng bad Dorbar Kur jong manla kawei pa kawei ka kur.
Katkum ka kyrwoh ka Synjuk ka kyntu ïa baroh ki riew rangbah ba kin shim ïa kane ka wyrta kum ka dawot ba la wer ïa manla ki Rangbahkur, ki wahehkur, ki Rangbah shnong na baroh ki kur ki jait ha ka jylla bad na shabar jylla da kaba long kiba tipthuh ban kyntiew bui ïa la ka kur ha la ka Dorbar Thawaiñ Dalariti bad ban pyntip ruh ha ka Synjuk khnang ba yn lah ban khmih ïa baroh ki jingdonkam jong ki khun ki hajar ha kano kano ka bynta jong ki jingdonkam ha ka imlang sahlang.
Ha kane ka jingïalang ka ban long ha Ïing Dorbar Shnong Smit, Hima Khyrim ha ka 1 tarik u Nailar, 2026 naduh ka por 11 baje mynstep, yn ïoh ki jingkren halor ka riti tynrai, ka aiñ mynta, ka stad maïan longbriew manbriew (Biological and Anthropological Sciences) da ki riewtbit kiba dei hi da la ki paradoh parasnam la jong.
Kane ka dei ym tang ka sur ki paidbah, hynrei ka sur kaba ud na ka snam jong ka longkur longkha, ong ka kyrwoh ba la phah da u Bah Raphael Warjri Sainpynair Lumlang, bad Bah R L Kharpran Khlieh Rangbah ka Synjuk ki Rangbah Kur ka Bri U Hynñiewtrep.