Halor ka Shillong Peak Ropeway Project, baroh ki jingai jingbit ladep ban ioh lut

Shillong, Naitung 28: Ka sorkar Meghalaya ha ka sngi ba-ar ka la wad ki lad ki lynti ban weng ïa ki jingsngewkhia jong ki paidbah halor ka Shillong Peak Ropeway Project, da kaba pynpaw ba kane ka projek ka la ioh ïa baroh ki jingmynjur katkum ka ain bad la pyntreikam da kaba pyrkhat bha ïa ka mariang bad ïa ka imlang sahlang.
Ha ka kyrwoh khubor, ka Meghalaya Ropeway Development Authority kaba hap hapoh ka tnad jngohkai pyrthei ka la ong ba ïa kane ka ropeway kaba kot sha ka T. 151 klur tyngka la pyntrei kum shi bynta jong ka skhim PM-DevINE.
La tehsong ïa ka jingbei pisa bad ka New Development Bank kaba la noh synniang T.80.89 klur bad ka Ministry of DoNER kaba la ai T.70.11 klur.
Ka jingtrei halor katei ka ropeway kaba jrong 896 meter, ka ban don 13 tylli ki kamra ba la shna katkum ki kyndon jong ka European CEN, la buh ban sdang ha ka 15 tarik u Risaw 2025.
Ki heh ophisar ki la ong ba kane ka projek ka thmu ban ai ïa ki nongjngohkai pyrthei ka lad ban leit jingleit kaba kham bha katba ka thaw ruh ïa ki lad ai kam ai jam ha ka thaiñ bad pynduna ïa ka jingïaid kali, sha Shillong Peak.Shisien ba la pynkhreh, la khmih lynti ba kan long kawei na ki lynti ïaid ropeway ki ban kit nongleit nongwan kiba mynta ha ka ri.
Ka bor ba dei peit ki la kdew ba ïa kane ka projek la thmu da ka tnad jngohkai pyrthei ha ka jingïatreilang bad ka Riat Laban Dorbar Pyllun, kaba la ai wai ïa ka jaka kaba heh 7,416.95 sqm na ka bynta kane ka jingthmu katkum ka jingïateh ba la ïasoi ha u bnai Kyllalyngkot 2023.
Ha kaba iadei bad ka mariang, ka sorkar ka la ong ba ïa ka forest clearance na ka bynta ban pynkylla ïa ka jaka kaba 2.3357 hektar la ai da ka tnad ka Ministry of Environment, Forest and Climate Change ha ka 24 Risaw 2024.
Ïa ka jaka ba siew bai lutksan na ka bynta ban thung dieng la pynkylla ha u bnai Nailur 2023, bad la bud ryntih ïa ka rukom treikam kaba dei katkum ka Forest Rights Act.
Shuh shuh la pyntip ruh ba la dep ioh ruh ïa ka jingbit ban pom ïa ki 544 tylli ki dieng hadien ba la buh dak bha ïa ki.
Ka kyrwoh ka la bynrap ba la dep ban pynlong ïa ki jingïamir jingmut bad ki paidbah ha u bnai Nailur 2022 bad hadien kata la pynlong ïa ki jingïalang jong ki nongdong bynta lang.
Katkum ka jingpynbna EIA 2006, kane ka projek kam donkam ban ioh ïa ka environmental clearance.
Baroh ki NOC kiba ïadei bad ka jingïada la dep ïoh, kynthup na ka bor jong ka Airports Authority of India ha u bnai Ïaiong 2023, na ki shipai Air Force ha u bnai Naitung 2023, bad na ki Army ha u bnai Nailur 2023.
Ka sorkar ka la pynpaw biang ba ka jingpynroi bad ka jingiada ïa ka mariang kan ïaid ryngkat ryngkat.