Shillong, Naitung 28: Ka Employees’ State Insurance Corporation (ESIC), ka Tnad Labour & Employment, Sorkar India, ka la pynlong ïa ka Mega Awareness Programme ha nongbah Shillong kum shi bynta ki jingrakhe ïa ka jingdap 75 snem jong ka ESIC (2026-27) hapoh ka phang pdeng”Ka jingaiti na ka bynta ka bha ka miat jong ki nongtrei, ka jingïada ïa ka imlang sahlang & ka jingtei ïa ka ri.”
Kane ka prokram ka thmu ban kyntiew ïa ka jingpynsngewthuh shaphang ka Skhim Employees’ State Insurance (ESI) bad ban pynïar ïa ka jingïada na ka bynta ki nongtrei ha kylleng ka Jylla Meghalaya.
U Bah Garod LSN Dykes uba dei u Secretary ka Tnad Labour, Employment & Skill Development jong ka Sorkar Meghalaya u la plie ïa ka jingïalang kum u Kongsan. Ha kane ka prokram la ïashim bynta da u Champak Biswasuba dei u Regional Director ka North Eastern Zone; u Pranay Sinha, Insurance Commissioner; bad u Ahtesham, Deputy Director, ESIC, nalor ki nongai kam, ki nongtrei, ki nongmihkhmat jong ki nongtrei bad kiwei kiwei kiba don bynta ha kane ka kam.
Haba ai jingkren ha kane ka jingïalang, u Bah Garod LSN Dykes u la ïaroh ïa ki sienjam jong ka ESIC ban pynkhlaiñ ïa ka jingïada ïa ka imlang sahlang bad ki jingshakri ba ïadei bad ka koit ka khiah na ka bynta ki nongtrei ha Meghalaya. U la ban jur ïa ka jingdonkam ban kyntiew ïa ka jingsngewthuh bad ban pynthikna ba la wanrah ïa uwei pa uwei u nongtrei uba dei hok ban ïoh hapoh ka Skhim ESI.
U Pranay Sinha, Insurance Commissioner, North Eastern Zone, ESIC, u la ban jur ba ka Skhim ESI kadei kawei na ki rukom treikam kiba pura jong ka India ha kaba ïadei bad ka jingshngaiñ ha ka imlang sahlang, kaba ai jingsumar khlem da hap pyndonkam ïa ka pisa, ka jingsiew bai lutksan na ka bynta ka jingmynsaw ha ka kam, ka jingai bai bam tymmen ïa ki khun ki kti, ki jingmyntoi na ka bynta ka jingkha khun bad kiwei kiwei ki jingmyntoi ba ïadei bad ka jingshngaiñ ha ka imlang sahlang.
U la pyntip ba ka jingmynjur dang shen na ka bynta ka Ophis Sub-Regional jong ka ESIC ha ka Jylla ha ka jingïalang jong ka ESIC Corporation kaba 198 ha New Delhi kan nang kyntiew shuh shuh ïa ka jingai jingshakri bad ka jingpynsaphriang jingtip. U la ban jur ruh ïa ka Skhim Ward of Insured Person (Ward of IP), ha kaba ki khun jong ki briew kiba la don Insurance ki lah ban ïoh rung ha ki ESIC Medical College ha kylleng ka ri ba la buh kyrpang na ka bynta kito kiba ïoh jingmyntoi na ka ESI.
