Kum ka Authority yn treikam noh ka NSTDA nangne shakhmat, mynjur yn don noh ka Border Research Wing

By Mawphor Editor On Jul 28, 2026

Shillong, Naitung 27: Ka Kynhun Myntri ka Sorkar Jylla ha ka sngi Nyngkong ka la mynjur ïa bun tylli ki rai kiba kongsan, kynthup ïa ka jingkyntiew kyrdan noh ïa ka New Shillong Township Development Agency sha ka New Shillong Development Authority (NSDA) nangta ka jingthaw ïa ka Research Wing hapoh ka Meghalaya Border Areas Department bad ruh ka jingpynkylla ïa ka Meghalaya Goods and Services Tax (GST) Act.
Haba kren sha ki lad pathai khubor hadien ka jingïalang jong ka Kynhun Myntri kaba la pynïaid da u Myntri Rangbah ka jylla u Conrad K. Sangma, u Myntri ka Sorkar jylla u Marcuise N. Marak u la ong ba ka Cabinet ka la mynjur ïa ka jingpynkylla ïa ki New Township Development Agency Rules, 2012.
“Mynta ïa ka Agency la pynkylla sha ka New Shillong Development Authority (NSDA). Mynshwa ka treikam kum ka Agency, hynrei hadien kane ka jingpynkylla kan treikam noh kum ka Authority,” ong u Myntri.
Ka Cabinet ka la mynjur ruh ban thaw ïa ka Research Wing hapoh ka Meghalaya Border Areas Department.
U Myntri u la ong ba hadien ka jingmynjur ïa kane ka bynta thymmai, ka tnat kan sa pynkhreh ïa ki service rules kiba donkam bad kan sdang ruh ïa baroh ki kam ba donkam ban pyntreikam ïa kane ka bynta.
Ha kawei pat ka rai kaba kongsan, ka Cabinet ka la mynjur ïa ka jingpynkylla ïa ka Meghalaya Goods and Services Tax (GST) Act lyngba ka Ordinance.
U Myntri u la ong ba kane ka jingpynkylla ka long katkum ki rai ba la shim da ka GST Council jong ka Sorkar India.
“Katkum ka rukom treikam, kino kino ki rai ba la mynjur da ka GST Council ki dei ban ïoh ruh ïa ka jingmynjur jong ka Cabinet ka jylla. Kumta, ngi la mynjur ïa kane katkum ki kyndon bad ki jingïalam ba la buh da ka GST Council,” la ong u Myntri.
Na ka bynta ka jingrakhe ïa ka Independence Day 2026, ka Kynhun Myntri ka la thung ïa ki VIP ban shim ïa ka salute ha ki jingrakhe ha ki district bapher bapher jong ka jylla.
U Myntri u la ong ba ki ophisar kin ïakren bad ki Myntri ban rai ïa ki district kiba ki kwah leit ban mihkhmat ha ka jingrakhe ïa ka Independence Day ha ka 15 tarik Nailar.