Da u motdur ba pura pynïeng ka IIM Shillong ban kynmaw burom ïa lyngkhuh sngi ïap u Dr. A.P.J.Abdul Kalam

Shillong, Naitung 27: Ka Indian Institute of Management (IIM) Shillong ha ka sngi Nyngkong ka la kynmaw burom ïa ka lyngkhuh sngi ïap kaba 11 snem jong u President barim ka ri, u Dr. A.P.J. Abdul Kalam, da kaba pynlong ïa ka prokram kaba shongkun bha bad plie paidbah ïa u motdur ba pura jong u ba la shna da ka rnong hapoh phyllaw jong kane ka jaka pule.
Ïa u durmot ba shi rynïeng ba jrong haduh 8 phut la plie paidbah da u Shishir Kumar Bajoria, Chairman ka Board of Governors jong ka IIM Shillong, ha ryngkat ka jingdonlang ki dkhot ka Board u Atul Kulkarni bad u Nitin Sharma, u Director Prof. (Dr.) Arun Mohan Sherry, u Chief Administrative Officer Col. Dinesh Adhikari (Retd.), nalor ki nonghikai, ki nongtrei bad ki samla pule.
Ïa une u mot dur la buh kum ka dak kaba sah jingkynmaw ïa ka jingïadei kaba jan jong u Dr. Kalam bad ka IIM Shillong, lem bad ïa ka jingshakri kaba khraw jong u ha ka pule puthi, ka jingpyrkhat thymmai (innovation) bad ka jingtei ïa ka ri.
Kane ka sngi ka long ruh ka jingkynmaw ïa ka jingïalang paidbah kaba khatduh jong u Dr. Kalam.
Ha ka 27 tarik Naitung 2015, u Dr. Kalam u la ai ïa ka jingkren paidbah kaba khatduh jong u ha ka IIM Shillong halor ka phang “How to Make Our Planet More Liveable”.
Ha katei ka jingkren, u la ban jur ïa ka bynta kaba kongsan jong ki sorkar, ki jaka pule, ki stad saïan, ki karkhana bad ki nongshong shnong, khamtam eh ki samla, ha ka ban tei ïa ka lawei kaba neh lyngba ka jingpyrkhat thymmai, ka jingsumar ïa ka mariang bad ka jingïalam lynti kaba don ïa ki nongrim kiba bha.
Ki samla pule ki dang kynmaw ieid ïa u kum “Kalam Sir”, bad ka jingïakynduh jong u bad ka jingïalang ha IIM Shillong ka dang sah kum kawei na ki por kiba kongsan tam ha ka histori jong ka shlem pule, kaba pynpaw ïa ka jingngeit jong u ha ka bor bad ka sap jong ki samla ban wanrah ïa ka jingkylla.
Ïa ka prokram la pynkut da ka jingbuh syntiew da ki nonghikai, ki nongtrei bad ki samla pule jong ka IIM Shillong ha une u mot dur ba shi rynieng ba dang shu plie paidbah.
Ka IIM Shillong ka la ong ba kan dang bteng ban bud ïa ka jingïohi jngai jong u Dr. Kalam ban tei ïa ki nongïalam kiba don jingstad bad ban kyntiew ïa ka jingroi kaba neh.