Nongpoh, Naitung 27: Uwei u samla u la duh noh ïa la ka jingim katba ar ngut kiwei pat ki la mynsaw jur hadien ka jingjia aksiden kaba la jia ha surokbah ha Umiam ha ka shiteng synñia jong ka 27 tarik Naitung. La suba ba ka scooty ba ki lai ngut ki shong ka la shah tynrah ha kawei ka trok kaba la phet krad noh na katei ka jaka hadien ka jingjia.
Katkum ka jingïoh lum jingtip, kane ka jingjia ka la jia ha ka por kumba 12:35 baje shiteng synñia.Hadien ka jingjia, la lap ïa ki lai ngut ki samla ba ki la thiah lyngktar ha surokbah ryngkat ka jingmynsaw bad ka jingphlei snam, katba ka scooty kaba don ïa u nombor ML 05 AG 7001 ka la julor phum na ka jingshah tynrah.
Uwei na ki samla, uba la tip kyrteng kum u Rahul Ch. Sangma na South Garo Hills, u la khlad hashen ha katei ka jaka namar ka jingmynsaw kaba jur. Katba ar ngut kiwei pat, kiba ym pat lah ban ithuh kyrteng, ki la mynsaw bad la pynkit noh mardor sha Civil Hospital, Shillong ban ïoh jingïarap sumar.
Ki pulit jong ka Umiam Police Station ki la poi mar mar sha katei ka jaka ban pynlong ïa ka jingtohkit. Katkum ki dak ki shin kiba la lap ha katei ka jaka, ki pulit ki suba ba dei ka trok kaba la tynrah ïa ka scooty bad phet krad noh hadien ka jingjia.
Ïa ka met jong u Rahul Ch. Sangma la rah sha jaka buh metïap ha Civil Hospital, Shillong, ban leh ïa ka post-mortem, katba ka jingtohkit ban lap ïa ka trok bad ïa uba ñiah ïa ka ka dang ïaid shakhmat.
