Yn mihkhmat ka North Liberty, Little Star bad OM Roy ïa ka jylla sha ka National-level Subroto Cup

Shillong, Naitung 25: Ka North Liberty HSS na West Jaintia Hills, Little Star HSS na Eastern West Khasi Hills bad ka OM Roy Memorial HSS na East Khasi Hills kin ïoh ban mihkhmat ïa ka jylla Meghalaya ha ka kyrdan ïakhun National-level Subroto Cup mynta u snem.
Kane la pynthikna hadien ba baroh lai tylli ki kynhun ki la rah ïa ka nam lahduh ha la ki jong ki kyrdan ïalehkai jong ka State-Level Subroto Mukherjee Cup Football Tournament 2026, kaba la poi sha kaba kut ha ka sngi Saitjaiñ ha madan First Ground-SSA Stadium.
Ha ka kyrdan ïalehkai U-15 jong ki khynnah shynrang, la sakhi ïa ka North Liberty HSS (WJH) kaba la pynliem noh ïa ka Umpohliew Jingtip HSS (EKH) da 2-1 kol ha ka jingïalehkai kaba itynnad.
Ka North Liberty ka la pynkhihjar ar sien lyngba u Kyrshanlang Chyrmang (19′) bad u Malcolm Nongbsap (20′), katba ka Umpohliew ka la pynphai shi kol lyngba u Meshanskhem Kharbudon (43′), hynrei kam shym la biang ïa ka kynhun ban khyllie pat ïalade na ka nam rem.
Nangta ha ka kyrdan ïalehkai U-17 jong ki kynthei, ka Little Star HSS (EWKH) ka la pynliem noh ïa ka North Liberty HSS (WJH) da 4-1 ha ka jingïashut penalty lane tie breaker, hadien ba ka jingïakhun ka la ïakhaid khlem kol haduh ba kut ka por.
Khatduh, ki rangïalehkai ka OM Roy Memorial HSS (EKH) ki la pynthikna ïa ka khusnam lahduh ha ka kyrdan U-17 ki shynrang da kaba jop suk da 3-0 ïa ka Wapung HSS (EJH) ha ka phainal.
U Deiwamut Syiem (21′, 69′) u la pynkhihjar ar sien katba u Chesterfield Umsong (43′) u la bynrap kawei ka kol ban pynskhem ïa ka jingjop.
La sam ruh ïa ki khusnam shimet sha ki rang bad thei ïalehkai ba kynsai ha ka jingïalang pynkut ïa ka lympung. Ha ka kyrdan U-15 boys u Fairland Nengnong (Umpohliew Jingtip) u la khur ïa ka ‘Best Goalkeeper’, katba u Inibait Lamare (North Liberty) ïa ka nam Player of the Tournament.
Ka Joplin Thongni (Little Star) ka la khur ïa ka khusnam Best Goalkeeper ha ka U-17 girls; katba Player of the Tournament la khur da ka Jessica Myrthong (Little Star). U Redimingson Phawa (Wapung) u la khur ïa ka nam Best Goalkeeper ha ka kyrdan U-17 boys, katba u Ebenezer Sun (OM Roy Memorial) ïa ka khusnam Player of the Tournament.
Ha katei ka sngi la wan kongsan da u President ka Meghalaya Football Association, bah Hamletson Dohling, ha ka jingïadon lang u Vice-President bah Cliff Nongrum bad u Director in-charge of Sports & Youth Affairs u bah Paia B War Nongbri nalor kiwei kiwei.