Shillong, Naitung 26: Ka Langsning FC ka la mad ïa ka jingjop ha ka jingïalehkai sdang ïa ka Shillong Premier League 2026 ha ka sngi Saitjaiñ ha madan First Ground-SSA Stadium, hynrei ka jingïakhun kam shym la long satia kaba suk na ka bynta kane ka kynhun kaba ïada mynta ïa ka nam lahduh, ha kaba ka la lah ban pynliem da tang 1-0 ïa ka Sawmer.
U Kyrmenskhem Mukhim u la pynurlong ïa ka namtam na ka bynta ka Langsning da kaba pynkhihjar ha ka minit kaba 81 jong ka kylla miet.
Kane ka dei ka sienjam kaba 15 jong ka SPL, ka lympung phutbol ba pawnam tam jong ka nongbah Shillong bad kaba ki nongkyrshan ki sngewtynnad bad shitrhem bha ha kylleng ka jylla Meghalaya.
Ha ka sngi sdang ïa ka lympung ki dkhot nongkitkam ba la rangbah jong ka Shillong Sports Association ki la don lang ban ai khublei ïa ki nongïalehkai bad ki nongpynïaid (match official) ïa ka jingïalehkai shuwa ban ïaid shakhmat ïa ka jingïakhun.
Ka Langsning ka la pynkhlaiñ ïa ka kynhun ïalehkai jong ka hashwa ka Durand Cup 2026 ka ban sa wan hynrei ka la paw kumba ki nongïalehkai ba thymmai ki dang donkam shuh shuh katto katne por ban shem ïa ka sur ïalehkai jong ki ha kane ka kynhun ba thymmai.
U Syed Ahmed, u rangïalehkai khmat ba jrong ka rynïeng jong ka Langsning, u la ïoh artylli ki kabu ha ka kylla step hynrei um shym la lah ban pynkylla ïa ki sha ka jingmyntoi. Hynrei ka kabu kaba thikna jong u ka la wan ha ka minit kaba 69 na ka bol pashat jong u Kyrmen, hynrei u Ahmed um shym la lah ban pynïasoh ïa ka kjat jong bad ka bol kaba la shu lait syrwa ei. Ki la don ruh katto katne ki jingpyrshang jong u Samuel L Kynshi, ki bym shym la seisoh, kaba nyngkong la shah khanglad ha u rangap-dien bad kaba ar ka jingpyrshang jong u kam shym la ïaid kumba la thmu.
Ki rangap-kol ki la long ki rangïalehkai ba kynsai tam ha kane ka jingïakhun, ha kaba u Rajat Paul Lyngdoh ka Langsning u la lah ban kner ïa ki kti ban kyntait ïa ka jingpyrshang thep kol jong u Raikutshisha Buam ka Sawmer ha ka minit kaba 38. Sha kawei pat ka liang jong ka madan, u Pyrshangbanbha Dkhar ka Sawmer, u la shah pynbor ban sei ïa ka sap ba kyrpang ban khanglad ïa katto katne ki kabu ba thikna ha baroh kawei ka jingïalehkai.
Ha ka kylla miet ka Sawmer ka la ïoh katto katne ki free-kick kiba ai jingkyrmen hynrei baroh ki la shu long lehnoh ei. Khatduh khatwai u Kyrmen u la pynïakhlad ïa ka jingïakhaid da kaba pynkhihjar na ka bol pashat jong u Samuel Phawa, ha kaba u Pyrshangbanbha um shym la lah ban khanglad ïa ka.
Ka jingïakhun kaba ar jong ka SPL 2026 kan long ha kane ka sngi Nyngkong hapdeng ka Nongkseh kaba dang shu kiew kyrdan, pyrshah ïa ka Mylliem ha ka por 6:30 baje janmiet.
Kane kan dei ka samoi kaba ar na ka bynta ka Mylliem ha ka SPL – ka la lah ban kiar na ka jingshah sloit kyrdan ha u snem ba la dep bad kan kyrmen ban ïalehkai bha mynta u snem, watla kan long ka jingïakhun kaba jwat pyrshah ïa ka Nongkseh, kaba la synshar lut ha ki lympung bapher bapher ha u snem ba la dep.
