Nongstoiñ, Naitung 26: Ka All Lyngngam Organisation hapoh ka jingïalam u Dr Bostick Mawsor President rangbah jong ka seng, ha ka janmiet sngi saitjaiñ ka la pdiang burom ïa u heprit Donald Marthong u ba la wan poi mynta ka sngi ha sor Nongstoiñ, hadien ba u la ïoh ban leit mihkhmat ïa ka Ri India shabar Ri lyngba ka jingïalehkai Football na ka Club ba pawnam ka Minerva Academy FC, ha kaba ka kynhun jong utei u heprit ka la rah ruh haduh ar tylli ki nam lahduh na ki lympung jingïalehkai Football kiba heh.
Ka seng ALO da ka jingkmen ka la ap lypa ha sor Nongstoiñ bad mar sien poi utei u heprit, ka seng ka la ïoh ban pynkup burom da ka jaiñ ryngkat u syntiew, u kpieng. Ka seng ka la ïoh ban ïa pajut kti bad utei u heprit da ka song pisa bad la ong ba katei ka jingleh jong ka seng, ka long kum ka dak ban ai mynsiem ïa ki heprit ka thaiñ, khnang ba kin nang shlur shuh shuh ban minot ha ki jingïalehkai bapher bapher.
U President rangbah u la ong ba ka la long ka jingsngew sarong ïa ka thaiñ, namar wat haba utei u heprit u dei u ba na ka shnong Risiang, ka shnong kaba dei tang ka nongkyndong na ka thaiñ Maweit West Khasi Hills District. Hynrei, kaei kaba utei u heprit u la kynjoh mynta, ka la wanrah ïa ka burom ïa ka shnong, ïa ka thaiñ, ïa ka jylla bad ïa ka Ri India hi baroh kawei. Kumta, ka seng kam lah khlem da pdiang burom ïa utei u heprit u ba dei hok ban ïoh ïa ka jingpdiang burom.
Kumban shu pyntip ba ka Minerva Academy FC kaba na ka jylla Punjab, naduh ka 6 tarik u Naitung 2026 ka la leit ban ïashimbynta sha ka Ri Finland bad ka rah shisyndon ïa ka nam lahduh ïa kawei ka lympung kaba la tip kum ka Helsinki Cup of Finland.
Ym tang katta hynrei katei ka club jong kitei ki heprit kaba kynthup ïa u Mekhamkhraw Nongrem na Mairang bad u Donald Marthong na Risiang, kiba na ka jylla Meghalaya ha kaba ki la jop ruh sa ïa kawei pat ka lympung kaba la tip kum ka Gothia Cup ha ka Ri Sweden, ha kaba ha katei ka lympung ruh ki la rah ïa ka nam lahduh kiba dei ruh ki lympung kiba heh duh ha kitei ki baroh ar tylli ki Ri.
Lah ban ong hangne ba wat la ka Ri India kam shym la kot bor ban poi ïashimbynta sha ka lympung ba heh duh ka pyrthei ne ka World Cup. Hynrei, ka jinglah jong kine ki club jong ki heprit kiba na ka Ri India, khlem pep kan pynïoh mynsiem shibun ïa kiba ieid Football ban don ka jingkyrmen, ba ha kawei ka sngi ka Ri India ruh kan sa kynjoh ne poi sha ka World Cup.
