Halor ka jinglait tuh ki jingkylli ka NEET weng kam ka sorkar pdeng 47 ngut ki nongtrei ka NTA

New Delhi, Naitung 25: Ka National Testing Agency (NTA) jong ka ri ka la pynkhreh ïa ka jingpynkylla kaba khraw, ha kaba ka Sorkar Pdeng kala weng kam haduh 47 ngut ki nongtrei jongka halor ka jingsuba jur ha ka jinglait tuh jong ki jingkylli jongka eksamin NEET.
ïa kane ka rai la shim ha ka 20 tarik u Naitung, kum shi bynta jong ka jingpyrshang ha ka ri baroh kawei ban pynneh ïa ka jingshaniah ha ki eksamin kiba la pynlong ha ka ri, hadien ba ki la mih ki jingkynnoh ba ka la don ka jinglait tuh jong ki jingkylli jong ka eksamin NEET-UG ha une u bnai, kaba la lam sha ka jingïakhih ki samla pule ha kylleng ki jaka.
ïa kane ka rukom khmih bniah la phai khmat ruh sha ka thaiñ shatei lam mihngi ka ri, ha kaba da ki lak ngut ki samla pule kiba shaniah ha ka National Entrance Examinations ban ïoh ïa ka admission ha ki college kiba tbit.
Ki samla pule ha kylleng jong ka ri ki la dawa ba dei ban leh da kaba tyngeh pyrshah ïa kito kiba donkti ha ka ban leh tuh ïa katei ka eksamin bad ban wanrah ïa ki jingkylla ban pynthikna ba ka dei ban long shuh shuh kaba khuid ba suba bad kaba don ïa ka dor ha ka rukom pynïaid ïa ki eksamin.
U Myntri Rangbah duh ka ri ula pynthikna ïa ki samla pule ba kito kiba donkti ha katei ka jingleh tuh ïa ka eksamin kan ym don ka jingmap ïa ki bad ka ïeng skhem ha ka jingkular ka sorkar ba kan ym ïapeiñ, ka bym shah liang bad ka khuid ka suba ha ka rukom pynïaid ïa ki eksamin.
Ha kawei pat ka liang, ka Kynhun Myntri jongka Sorkar Pdeng ka la ai jingmynjur ïa ki 10 tylli ki jingtyrwa ban wanrah da ka aiñ ban tehlakam ïa ki jinglait tuh ki jingkylli hapoh ka ri, da kaba pynsaja haduh 10 snem ïa kito kiba donkti ha ka ban leh thok ïa ki eksamin. Lada pyntreikam, ki nongleh bakla kin mad ïa ka jingshah pynsaja hapoh ki kyndon jong ka jingleh ïa ki kam runar da kaba ïasuh buit.
Hapoh jong katei ka kyndon aiñ kaba la tyrwa, kino kino ki riew shimet ne kynhun kiba donkti ha ka ban lait tuh ki jingkylli, ban leh tuh, ban ak kum kiwei pat ki briew ne ban pynjulor ïa ki kor digital (digital tampering) kin mad ïa ka jingshah pynsaja ban siew haduh 10 Klur tyngka.
Kane ka jingthmu jong ka jingwanrah ïa ka jingkylla, ka dei kawei na ki sienjam kiba khraw ban shim khia ïa ka jingbitar jong ki paidbah halor ka jingleh tuh ïa ki eksamin bad ban pynneh pynsah biang ïa ka jingshaniah hapdeng ki phew lak ngut ki samla pule, kaba ka lawei ka jongki kan shong eh ha ka rukom pynlong ïa ki eksamin kaba ïaid beit ïaid ryntih.