Hadien ba la iehnoh u Dharmendra, shimti u Pralhad Joshi kum u Myntri ka tnat Pule puthi ba thymmai

New Delhi, Naitung 25: U nongïalam ka BJP u Pralhad Joshi ha ka sngi saitjaiñ u la shah thung kum u Myntri ka tnat Pule Puthi jong ka sorkar pdeng hapdeng ki katto katne ki kynta ba la iehnoh kam u Dharmendra Pradhan. U Pradhan u la iehnoh ïa katei ka shuki ban shim kum ka jingkitkhlieh halor ka jingkynnoh lait tuh ka jingkylli NEET-UG kaba la wanrah ka jingïakhih kaba jur ha ka ri baroh kawei ha kaba ki samla ki la pynpaw ka jingbitar halor kane ka jinglait tuh ka jingkylli.
Ïa ka jingiehnoh kam jong u, la pdiang sngewbha ruh da ka President ka ri ka Droupadi Murmu. U Joshi, uba dei u MP ka Lok Sabha na Karnataka, ka Dharwad constituency u dei ruh uba bat ka tnat renewable energy and consumer affairs, food and public distribution.
Kum u MP ba la jop la 5 sien, mynshwa u la shakri ïa ka tnat coal, mines and parliamentary affairs kum u Myntri ka sorkar pdeng. Kum u Myntri ka tnat new and renewable energy, u Joshi u la long u nonglam khmat ïa ka jingpyrshang jong ka sorkar pdeng ban pynïoh ïa ka clean energy capacity, da ka thong ban kynjoh ïa ka 500 GW ka renewable bad non-fossil fuel energy capacity hapoh u snem 2030 bad ka net-zero emission hapoh u snem 2070.
U la khmih ruh ïa ki kam kiba hakhmat ba kynthup ïa ka National Green Hydrogen Mission, PM Surya Ghar Muft Bijli Yojana, PM-KUSUM scheme bad ki offshore wind energy project.
Kane ka jingshah thung jong u, ka la wan ha ka por kaba kongsan bha naba ka tnat Pule Puthi ka la pyntreikam ïa ki rukom ba thymmai haba ïadei bad ka jingdon ka jingsuba bym ïaid beit ka NEET-UG, ba kynthup ïa ka jingthaw thymmai ïa ka National Testing Agency (NTA), ki sienjam ba pyrkhing ban ïada na ki jinglait tuh ki jingkylli bad ka jingpynkynriah ïa ka computer-based testing na ka bynta ka NEET haduh ka snem 2027.