Hapdeng ka jingshah pynbor kaba jur na ki samla ka ri ïehnoh kam u Dharmendra Pradhan

New Delhi, Naitung 25: U Union Education Minister u Dharmendra Pradhan u la pynbna ba u la risain na ka kam ha ka sngi saitjaiñ hadien ba u la shah pynbor kaba jur bha na ki paidbah bad ki saiñ pyrthei hadien shi taiew jong ka jingïakhih jong ki samla pule ha baroh kawei ka ri halor ka jingkynnoh ba ki don ki jingbym ïaid beit ryntih ha ki eksamin kiba la pynmih ïa kawei na ki jingïakhih ki samla kaba heh tam ha kine ki snem ba la dep.
U Pradhan u la aiti ïa ka jingiehnoh kam jong u sha u Myntri Rangbahduh ka ri u Narendra Modi hadien ka jingïakhih jong ki samla pule bad ki seng samla ban dawa ïa ka jingkitkhlieh halor ka jingkynnoh ba la lait tuh ki jingkylli jong ka eksamin NEET bad ka jingpynkylla ïa ka rukom thoh eksamin jong ka ri.Ki jingiakhih kiba la saphriang ha ki katto katne ki nongbah, ki la pynlong ïa ka jingrisain jong u kum kawei na ki jingdawa ba kongsan jong ki.
Kane ka jingrisaiñ ka wan tang katto katne sngi hadien ba u Myntri Rangbahduh u Modi u la kren sha ki samla pule bad ki kmie ki kpa kiba sngewkhia ha kylleng ka ri, da kaba wad ban pynthikna ïa ki ba ka sorkar ka la thmu ban pynphai biang ïa ka jingshaniah ha ka rukom thoh eksamin jong ka ri India.
Ha ka sngi Thohdieng, ka Centre ka la sdang ïa ki lad ki lynti, kynthup ïa ka jingpynbeit thymmai ïa ka National Testing Agency (NTA), weng noh ïa ki 42 ngut ki heh kiba don jingïadei bad ki jingbym ïaid beit ha ka eksamin, bad sdang ïa ki jingtohkit ba kyrpang halor ki jingjia ba lait tuh ki jingkylli.Ka sorkar ka la pynskhem ba tang ka jingpynkylla kaba bniah ïa ka rukom treikam, ym ka jingleh marwei pyrshah ïa ki katto katne ngut ki briew shimet kiba lah ban khanglad ïa kum kine ki jingjia ban jia biang.
Ki seng samla pule bad ki nongïalam jong ka jingïakhih ki la pdiang sngewbha ïa ka jingrisaiñ jong u Pradhan kum ka sienjam kaba kongsan sha ka jingkitkhlieh.
Hynrei, ki la ban jur ba ka jingïakhih jong ki kan ïai bteng haduh ban da pyntreikam ïa ki jingpynkylla ha ka rukom treikam kiba don jingmut ban pynthikna ïa ki eksamin paidbah ba kin long kiba shai, kiba leh hok bad kiba shngain, ryngkat bad ka lynti ïaid na ka bynta ka jingpule kaba bha bad ki lad ïoh kam kiba don burom na ka bynta ki samla jong ka ri.
Ki jingïakhih, kiba la kyrshan da ki liang pyrshah bad ki seng bhalang, ki la pynthut ïa ka Parliament bad khring ïa ka jingpyrkhat jong ki ri ka pyrthei.Dang shen, u nongïakhih u Sonam Wangchuk u la pynkut noh ïa ka jingshah thngan jong u kaba la slem bha hadien ba ka sorkar ka la pynthikna ban ïakren halor ka jingpynkylla ïa ka pule puthi.
Hynrei ki kynhun samla pule ki la pynpaw biang ba ka jingïakhih jong ki kan dang ïai bteng haduh ban da pyntreikam ïa ki jingpynkylla kiba skhem bad ban pynbeit ïa ki jingdawa jong ki kiba la slem bha.
U Pradhan, uba la shakri kum u Myntri ka tnad Pule Puthi jong ka Sorkar Pdeng naduh u snem 2021, u la khmih ïa ka jingpyntreikam ïa ka National Education Policy jong ka Ri bad katto katne ki jingpynkylla ha ka pule puthi kaba kham shalor.Hynrei ki jingïakynad kiba ju jia man ka por ha kaba ïadei bad ki national entrance examinations ha ka ri ki la wan ban batai ïa ka bynta ba khatduh jong ka jinglong jong u, bad ha kaba kut ka la pynlong ïa u ban risaiñ noh.