Pynkup burom ka Sorkar Jylla bad Don Bosco ïa u samla Kitkupar ba wanrah burom na ka WCOPA ha Las Vegas,USA

Shillong, Naitung 25 : Ka Sorkar Meghalaya lyngba ka Directorate of Sports and Youth Affairs, ha ryngkat ka jingïatreilang bad ka Don Bosco Media Network Television (DBMN TV), ha ka sngi Saitjaiñ ka la pynlong ïa ka jingpynkup burom kaba shongkun bha ïa u nongrwai ba pawnam ka jylla u samla Kitkupar Nongsiej ha Khyndai Lad, Shillong, hadien ba la ïoh ban khur ïa ka jingjop kaba don burom ha ka lympung ïakob kaba heh tam ha ka pyrthei ka World Championships of Performing Arts (WCOPA) 2026 kaba la long ha Las Vegas, United States of America ha ka taiew ba la dep.
Kane ka jingpynkup burom ka long ban ai ka burom ïa ka jinglah jong une u samla ban wanrah nam bad burom ym tang ïa ka jylla Meghalaya hynrei ruh ïa ka ri India ha ka rynsan jingïakob rwai kaba heh tam ha ka pyrthei.
Hashuwa ban poi Shillong, u Kitkupar u la ïoh ïa ka jingpdiang burom ha Lokpriya Gopinath Bordoloi International Airport, Guwahati, na ki kmie ki kpa jong u, ki bahaïing, ki nongkyrshan na ka shnong Kynshi bad ka kynhun jong ka DBMN TV. Haba u la poi ha Mawlai ISBT, ka Sorkar Meghalaya ka la pynkup burom ïa u bad phah shaw kyrpang ha ka kynhun ki pulit haduh ban da poi ha Khyndai Lad, ha kaba bun bah ki paidbah bad ki paid ieit jingrwai ki la ap ban pdiang ïa u.
Ka jingïalang pynkup burom ka la sdang da ka jingkren pdiang sngewbha na u Fr. Michael Makri, SDB, Managing Director ka Don Bosco Media Network Television uba la ïathuh ia ka jingpynkhreh jong une u samla naduh ba u jop ïa ka Sur Kynud tad haduh ba un da poi sha katei ka lympung kaba heh.
La donlang ruh ha kane ka jingïalang naduh u Bah Paia War Nongbri, Acting Director ka Directorate of Sports and Youth Affairs kum u Kongsan, nangta kiwei pat ki riew rangbah, ki lad pathai khubor, ki kmie ki kpa jong u samla Kitkupar, bad ki paidbah kiba la wan ban ai mynsiem ïa une u samla.
Ban pynshongkun ïa ka prokram, ka nongrwai ba dang khie bha ka Chevinia Lyngdoh Mawnai, kaba long ka nongjop ha Sur Kynud Season 1 bad ka lahduh ha ka jingïakob rwai shabar ri, ka la rwai ïa ka jingrwai Khasi ba ka la thaw hi kaba kyrteng “Kum u Khlur”, kum ka jingai burom ïa u Kitkupar bad ka jingïaid lynti kaba pynshlur jong u.
Haba ai jingkren, u Bah Païa War Nongbri u la ai khublei ïa u samla Kitkupar na ka liang ka Directorate of Sports and Youth Affairs bad ka Sorkar Meghalaya. U la ong ba ka jingjop jong u ka dei ka nuksa kaba bha tam ïa ki samla jong ka jylla, namar ka jingaiti, ka jingïaishah bad ka sap kyrpang jong u ki la kyntiew ïa ka burom jong ka Meghalaya ha ka kyrdan jong ka pyrthei.
U Kongsan u la ai jingïaroh ruh ïa ka Don Bosco Media Network Television bad ïa u Fr. Michael Makri kiba la shim ïa ka bynta kaba kongsan ban sei madan, ban hikai bad ban kyntiew ïa ki sap jong ki samla ha ka thaiñ. U la ai jingïaroh ruh ïa ki kmie ki kpa jong u Kitkupar bad ïa ki paidbah ka shnong Kynshi kiba la kyrshan skhem ïa u ha ka jingïaid lynti jong u.
Ka prokram ka la nang shongshit shuh shuh da ka jingrwai jong ka heprit Shellevah N. Jyrwa, ka nongjop ha Sur Kynud Season 4, kaba la ai ïa ka jingrwai “Sha Ki Khlur”, kaba pynpaw ïa ka jingngeit, ka jingïaishah bad ka jingangnud ban poi sha ka thong.
Ha ka jingkren, u samla Kitkupar Nongsiej u la pynpaw ïa ka jingsngewnguh kaba khraw ïa ka Sorkar Meghalaya, khamtam ïa u Myntri Rangbah ka jylla Conrad K. Sangma, uba la ai jingïarap pisa bad jingkyrshan ïa u ban mihkhmat ïa ka ri India ha ka World Championships of Performing Arts ha United States.
U la ai khublei ruh ïa ka Directorate of Sports and Youth Affairs, ki kmie ki kpa jong u, ki bahaïing hasem, ki nongkyrshan na Kynshi, ki paralok bad ki paidbah kiba la kyrshan bad duwai na ka bynta ka jingjop jong u. U la ai ruh ka burom kaba khraw ia ka iing ka sem jong u Don Bosco hapoh ka jingialam jong u Fr. Makri kiba la saindur ia u haduh ba un da shah jied ban aireng ha katei ka lympung kaba heh tam ha ka pyrthei.
Haba phai dien sha ka jingïaid lynti jong u, u Kitkupar u la iathuh ba ka jingmih jong u sha ka rynsan jong ka pyrthei ka la sdang hadien ba u la jop ïa ka Sur Kynud Season 3, ha kaba ka Don Bosco Media Network Television ka la ai ïa u ka lad, ka jinghikai bad ka jingïalam kaba la plie lynti ïa u ban poi sha kane ka kyrdan.
Haba ai ïa ka jingkren ai khublei, u Fr. Michael Makri u la pynpaw ïa ka jingsngewnguh ïa ka Sorkar Meghalaya, ka Directorate of Sports and Youth Affairs, ki lad pathai khubor, ki nongiarap, ki nongkyrshan bad baroh kiba la noh synñiang ban pynlong ïa kane ka jingpynkup burom kaba jop.
U la pynbna ruh ba ka Shellevah N. Jyrwa, ka nongjop ha Sur Kynud Season 4, ka la dep pynrung kyrteng ban leit shim bynta ha ka jingïakob Britain’s Got Talent, bad lada ka lah ban pyndep ïa ka audition, kan leit sha United Kingdom ha u bnai Risaw (October) 2026. “Kane ka long sa uwei pat u mawjam ha ka jingthmu jong ka DBMN TV ban kyntiew ïa ki sap jong ki samla ka thaiñ Shatei Lam Mihngi sha ka rynsan jong ka pyrthei,” u la ong.
Shuh shuh u ong ba ka jingjop jong u samla Kitkupar Nongsiej ha ka WCOPA 2026 ka sakhi ïa ka sap kaba kyrpang jong ki samla Meghalaya bad ka ai mynsiem ïa ki pateng ban wan ba da ka jingtrei shitom, ka jingkyrshan jong ka imlang sahlang bad ka jingïoh ïa ki lad kiba biang, lah ban pynurlong ïa ki jingangnud bad ban wanrah nam ïa ka jylla bad ïa ka ri ha ka kyrdan jong ka pyrthei.
Hadien kane, na ka liang ka iing ka sem jong u samla Kitkupar ki la pynlong ka jingpynkup burom kyrpang ia u Fr. Michael Makri kum ka dak ka jingsngewnguh ia ka jingkyrshan ha ka jingiaid lynti jong u naduh kaba sdang bad haduh ban da wanphai na ka jingiakhun.