Buhthong da ka G+5 ka jingtei ha Ïewdielang ban lah pynkylluid ïa ka Ïewduh ba la khapngiah

Shillong, Naitung 25: U Acting Syiem ka Hima Mylliem u Paiem Alban Fredrick Syiem ha ryngkat ki Myntri ki Basan ha Hima Mylliem ki la jurip ïa ka Ïewduh ban ïohi ïa ka jinglong jingman jong ka Ïew bad ruh ban sngap ban sngew ïa ki jingud jingnam jong ki khun ki hajar kiba shong ïew.
Ha kane ka jingjurip u la lap da la ki jong ki khmat ïa ka jingkhap ngiah, ka jingsma bad ka jingïathuh ba jur bha ka jingshah tuh shah thiem ha Ïewduh na ka daw ka jingkhap ngiah.
Haba kren sha ki lad pathai khubor u Paiem u la ong ba ka jingthmu kane ka jingjurip ka long ban lap ïa ki jingeh bad ka jinglong jong ka Ïewduh.
Haba ïadei pat bad ka jingkylluid ka Ïewduh u Basan Nongkseh u Bah Nathan Thangkhiew u la ïathuh ba kumba ka long mynta ka Hima ka dang ap ïa ka mang pisa na ka Sorkar jylla ban tei ïa ka G+5 ka ïewdie lang khnang ban lah ban ïoh pynrung lut ïa kiba die madan bad kumjuh ruh ïa kiba die jhur bad kumba ka long mynta ka jingtei ïa kane ka ïewdie lang ka dang dep tang shi mala kumta na ka liang ka Hima ka la angnud ban pyndep haduh 6 mala lada ki tnat sorkar bapher bapher ki lah ban pynlait kloi ïa ka pisa kumba la mang da ka sorkar.
Halor ka jingsei ïa ki tiar shabar dukan da ki bar jylla napoh ki dukan, u Basan u la ïathuh ba ka la don ka Order jong ka Hima halor kane bad yn sa phah ïa ki pulit Syiem ban bthah ïa kiba die dukan bad lada lap ba kim sngap kin ngat ha ki kyndon ka Hima Mylliem.
Katba u Myntri Nongkhlaw u Bah Ïaineh Nongkhlaw u la ong ba kin sa kyntu ïa kito kiba ïoh shong hapoh dukan ba kim dei ban sei ïa ki tiar shabar dukan.
Ha kane ka sngi kiba bun kiba shong dukan ki la pynpaw ïa ka jingeh ba jur palat ka jingshah tuh shah thiem ki tiar kum ki jhur na ka daw ka jingkhap ngiah ka Ïewduh.