Ka roi ka par, kyntiew ïa ka pule puthi bad thaw ki lad ïohkam ïohjam ki thong u Dr D.R.L .Nonglait sha khappud

Shillong, Naitung 25 : U Kyrtong MP Lok Sabha ka NPP u ban ïakhun ïa ka Elekshon shiteng samoi jong ka Shillong Lok Sabha u Dr DRL Nonglait ha ka Sngi Thohdieng ula ong, ba ki thong ba hakhmat eh ki long ban ïaleh ban wanrah ïa ki kam pynroi ha ki shnong kiba don ha thain khappud, ban wanrah ïa ki jingkylla ha ka pule puthi bad ban thaw ïa ki lad ïoh kam ïoh jam ïa ki samla ha khappud lada u shah jied ban leit mihkhmat sha ka Parliament.
Haba kren ha ka rynsan ïalap elekshon ha Patharkhmah, u Dr. Nonglait ula ong ba ki jaidbynriew ha ka thaiñ khappud jongka Meghalaya-Assam ki dei kiba la shah ieh beiñ lah slem bah bad ki dei hok ban ïoh ïa ki jingmyntoi kumba ïoh kiwei pat ha ki jaka bapher bapher jongka jylla.
“Ki shnong ha khappud ki donkam ïa ka bording elektrik, ki surok kiba biang bad ki skul kiba biang. Ki briew ki jong ngi kiba don hangtei ki dei ban ïoh ïa ki juh ki jingmyntoi kumba ïoh ki briew ha Patharkhmah, Maïrang bad kiwei kiwei ki thaiñ jong ka Ri Khasi” ula ong ha ka jingïalang.
Ula kynnoh ïa ki sorkar kiba rim kiba la pynbor ïa ki nongshong shnong ha khappud ban shaniah ha ka Assam bad kane ka la lam sha ka jingduh ei ïa ki jaka ki puta.
Ula ong ruh ba kane ka thaiñ ka mad ïa ki jingeh kaba donkam kyrkieh ban shim khia mardor, ha kaba ha kane ka jingïalang la ïadon lang u Symbud myntri Rangabh ka jylla u Ma Sniawbhalang Dhar, u MLA ka Jirang u Bah Sosthenes Sohtun bad u MLA ka Mawhati u Bah Charles Marngar.
“Ngi hap ban wanrah ïa ki kam pynroi bad ïa ka jingkiew shaphrang khnang ba ki paidbah ha ki thaiñ khappud kin sngew ba ki dei kiba don hapoh ka jylla Meghalaya bad ki dei ki Khasi bad Pnar ki bym shym la shah ieh beiñ” ula bynrap.
“Lada ba nga shah jied kum u MP , ngan wan hi dalade ban jngoh ïa kine ki thaiñ ha ki bnai ki ban sa wan. Ki kam pynroi ha khappud kan dei ka thong kaba ngan buh hakhmat eh” ula ong.
U Dr Nonglait ula pynpaw ruh ïa ka jingsngewkhia ïa ka jinglong jingman jong ki Secondary bad Higher Secondary School ha Jirang bad ha kylleng jong ka Ri Khasi, ïa kaba ki la ap lah palat 20 snem tam ban ïoh ïa ka jingkyrshan na ka sorkar wat hapdeng ba ki la ïoh ïa ka jingithuh.
Ula ong, ba ula dep ban aiti ïa ka jingtyrwa sha u Myntri Rangbah ka Jylla u Conrad K. Sangma bad sha ki Symbud Myntri Rangbah ka Jylla u Bah Prestone Tynsong bad u Ma Sniawbhalang Dhar ban ai ïa ka Salary Grants na ka bynta ki nonghikai ha ki Secondary School, ka ban ïasyriem kum ka Scheme na ka bynta ki skul LP bad UP.
“Ka pule puthi kam pat long kaba ryntih. Ngi donkam ïa ka polisi kaba shai kdar bad ngi donkam ïa ka jingïatreilang ban pynbeit noh ïa ka” ula ong.
U Kyrtong ka NPP ula ong, ba ka Meghalaya ka dei ban seng ïa ki Food Processing Unit khnang ba ki nongrep kin lah ban pynkylla ïa ki soh ki jongki sha ki mar kiba lah ban pynïaid ha ki ïew ki hat ban ïa kaba shaniah ha ka ban shim da kiwei pat.
Ula pynpaw ruh ïa ka jingduna ha ka jingdon jong ki karkhana shna juti bad ula pdiang ïa ka jingthmu ka Sorkar Jylla ban tei ïa ka Market Complex ha Patharkhmah bad Jirang ban kyntiew ïa ka khaïi pateng ha kane ka thaiñ.
Ha kaba ïadei bad ka kam jngohkai ula kdew ïa ka Pung Amkyrbai kaba don hajan Jirang ba ka dei ka jaka kaba kot bor ban khring bha ïa ki briew bad ula kyntu ïa ka sorkar ba ka dei ban leh ïa ki kam pynroi da kaba tei ïa ki jingtei ha kane ka jaka.
Ula kdew ruh ba kane ka thaiñ ka dei kaba bun bha ki kali kiba na Assam kiba wan ban ïaid lyngba ka Ri Bhoi ban leit sha kiwei pat ki district, kumta dei ban leh ei ei ha kane ka thaiñ ban khring ïa ki.
“Ngi don ïa ki jaka kiba itynnad hynrei ym shym la shna pynbha ei ei ïa ki. Ka Pung Amkyrbai ka lah ban kylla long kum kawei na ki jaka jngohkai kaba kongsan lada ngi bei ïa ka pisa ha ka” ula ong.
U Dr Nonglait ula ong, ba da ka jingdon u MP u ban ïaid ryngkat lang bad ka Sorkar Jylla kan pynsuk shibun ban tynruh ïa ki projek jong ka Sorkar Pdeng bad ki skhim kiba kot da ki klur tyngka.
“U MP na ka liang synshar yn ym donkam ban leit mareh na kawei ka jingkhang sha kawei pat. Ki paidbah ki lah ban wanrah beit beit ïa ki jingeh ki jongki bad ngi lah ban pynbeit ïa kitei lyngba ka jingïakren. Ka kam kan long kaba ïaid beit ïaid ryntih” ula ong.
Ula kyntu ia ki nongthep vote ba kin kyrshan ïa u kum u kyrtong uba lah ban ïatreilang bad ka sorkar ban pynïoh ïa ka jingdawa ban pyntreikam noh ïa ka ILP bad ban pynrung noh ïa ka ktien Khasi ha ka khyrnit kaba phra jong ka riti synshar ka ri.
“Ngam shym la ïakhun tang na ka bynta kawei ka seng. Nga ïakhun na ka bynta baroh ki nongthep vote jong ka Shillong Constituency” ula ong bad ka kyntu ïa ki paidbah ba kin ïa mih bun bad ban ïa mih ryntih ban leit thep vote.