Shillong, Naitung 25: Ka Industries and Trade Fair Association of Assam, North East Region kaba ju pynlong ia ka International Shillong Trade Fair and International Shillong Shopping Carnival kala pynlong ia ka Meghalaya UPSC Vision Conclave 2026.
Ïa kane ka UPSC Conclave la pynlong ha Shillong Club ha kaba ka MLA jong ka East Shillong ka Dr Mazel Ampareen Lyngdoh kala shim ïa ka bynta kum ka kongsan ha ka jingdon lang ryngkat bad ki samla pule na kylleng ki college jong ka nongbah.
Ka jingthmu ba kongsan ba pynlong ïa kane ka Meghalaya UPSC Vision Conclave 2026 da ka Industries and Trade Fair Association of Assam ka long ban pyni lynti ïa ki samla jong ka jylla ba tip ïa ki lad ki lynti kumba ban pynkhreh ban iakhun ïa ki eksamin.
Ha kane ka sngi na ka liang jong ka ITFAA kala pyllait paidbah ïa ka Meghalaya UPSC Vision Declaration 2026 lyngba ka jingiarap pisa kaba la ai ruh da ka cheque sha ka Khasi Student Union bad ruh sha ka Dorbar Shnong Laitumkhrah mar 50 hajar tyngka ba kin kyrshan ïa ki samla kiba kwah ban ïakhun ia ka eksamin UPSC.
Na ka liang jong ka Dr Mazel Ampareen Lyngdoh haba kren kum ka kongsan kala ong ba ki samla pule kidei ban don kata ka mynsiem kaba nud ban phohsniew ba shisien ka sngi kin poi sha ka thong ba kin iakhun ia ka eksamin jong ka UPSC ban long ki ophisar IAS bad IPS.
