Mairang, Naitung 24: Ka jingbam klumar ïa ki kynja jingbam kiba shu kheit na khlaw na btap khamtam eh ïa ki kynja tit ka lah ban wanrah ïa ki jingpang ba bun jait kiba ki briew ki lah ruh ban poi shaduh ka jingïap. Kumta na ka liang ka District Medical & Health Officer Eastern West Khasi hills district ka la pyntip sha baroh ki nongshong shnong hapoh ka district ba ki dei ban kiar na kaba bam klumar ïa ki kynja tit ba kheit na khlaw.
Ka la kyntu ruh ïa ki paitbah nongshong shnong ba ki dei ban da bishar bniah ïa ki jait tit kiba mih ha ki khlaw namar ki don bun bah ki jait tit kiba long bih kiba ïa synriem bad ki tit kiba long ban bam haba shu peit, sma da ka khmut, ne mad ha ka shyntur ruh. \
Ka la ong ruh ba teng teng wat lada thad pyntyrkhong bad ber da kino kino ki jait jingtah haba shet ruh kan ym lah ban pynduh ïa ka bih kaba ki don. Ha kajuh ka por ka la ong ba lada kim tip thikna ba ki dei ki jait tit ba long bam kim dei ban kheit klumar tang namar ba ki ïoh sngew ïa ka jingïathuh jong kiwei. Nalor kata ka la ong ruh ba lada kum bam ïa ki tit kiba long bih u briew u lah ban ïap tang ha ki khyndiat kynta bad haba kum bam ïa ki tit ba long bih ki dak ki shin kum ka jingprie bad pynhiar bunsien, ka jingbyrïe bad bym ïohi shuh ki khmat bad kiwei kiwei ki dak ki shin ki lah ban paw tang hapoh shiteng kynta.
Ka DM & HO ka la kyntu ruh ïa ki nongshong shnong ba ki dei ban bam tang ïa ki tit kiba thied na ïew na hat ïa kiba la pynthikna da ki stad wad bniah jong ka tnad ka koit ka khiah ba ki dei ki tit kiba long ban bam.
Shuh shuh ka la kyntu ïa ki nongshong shnong ba shuwa ba kin shet ki dei ban da siat bad pynkhuid bha bad ka la bthah ruh ba lada don kiba sngew shitom hadien ba ki bam ïa ki kynja tit ba kheit na khlaw ki dei ban leit bran bran sha ki hospital na ka bynta ban ïoh ïa ka jingsumar kaba biang. Khatduh eh ka la kyntu ïa ki rangbah shnong, ki ASHA, ki nonghikai skul, ki nongïalam balang ba kin pynsaphriang ïa kane ka khubor sha baroh ki nongshong shnong ba kin tip.
