Shillong, Naitung 24 : U Symbud Myntri Rangbah ka jylla u Ma Sniawbhalang Dhar mynta ka Sngi Thohdieng ula pynbna paidbah ba ka sorkar ka la pynkhreh ban ïarap song pisa sha palat 2 lak ngut ki Nongrep ha baroh kawei ka jylla bad ïa kane yn leh hapoh ka jingsynshar jongka sorkar MDA.
Haba kren ha ka jingïalang paidbah ha Patharkhmah ban pan jingkyrshan na ka bynta u kyrtong MP Lok Sabha ha kane ka election shiteng samoi u Dr DRL Nonglait, u Ma Sniawbha u la ong ïa kane ka jingthmu la ïakren sani bha bad u Myntri Rangbah u Conrad K Sangma bad yn sa pyntreikam lyngba ki nongtrei jongka party bad kumjuh ruh lyngba ki Seng jongki Nongrep.
“ Nga la ïakynduh ia u Myntri Rangbah ha ka Sngi Palei bad u la ïathuh ïa nga ban pyntip sha ki nongtrei jongka party bad sha ki Seng Nongrep ba ngi dang pynkheh ban ïarap song pisa sha palat 2 lak ngut ki nongrep hapoh ka jingsynshar jongka sorkar MDA” ong u Ma Sniawbha.
U la ïathuh ba kane ka song pisa kan ym duna ïa ka 5 haduh 7 hajar tyngka marwei marwei i Nongrep.
“ Don ki ban ïoh 5 hajar, don pat ki ban ïoh 6 hajar bad don ki ban ïoh 7 hajar tyngka ruh. Kane ka jingïarap song pisa ka long ban pynkhlaiñ ïa ki ban kham pyniar shuh shuh ïa ka rep ka riang jongki” ong biang u Symbud Myntri Rangbah.
Haba ïathuh ïa ki jingshim khia ka sorkar ban kyntiew ïa ka rep ka riang u Ma Sniawbha u la ong ba ki don bun ki nongrep ha kane ka jylla kiba la ïoh jingkyrshan na ka sorkar MDA hapoh ka jingïalam jongka NPP bad kane ka jingïarap ka la ai jingmyntoi shisha ïa ki.
U la ïathuh ruh ïa ki jingshim khia ka sorkar ban pynbeit ïa u pud u sam bad u la ong ba kane ka sorkar ka la pyrshang ban thaw ki lad ki lynti ban pyndep noh ïa kane ka kam ba sahteng la slem bah kaba kiwei ki sorkar ki khlem leh ei ei ruh em.
“ Phi hi da lade phi la tip bad ïohi ïa kaei ba ka sorkar ka la leh ha kaba ïadei bad ka kam pynbeit ïa u pud u sam. Ki sorkar kiba la leit noh ki khlem leh ei ei hynrei kane ka sorkar da ka jingshlur ka la shim rai ban pynbeit ïa u pud u sam bad ka jylla Assam khnang ba ki paid khappud kin im suk im sain” ong u Symbud Myntri Rangbah.
U la pynshai ruh halor ki jingkynnoh ba la ai ei ïa ki jaka puta sha ka Assam da kaba ong ba ka sorkar shwa ban pynbeit ïa u pud ka la leit jurip ïa baroh ki bynta khappud ban pynthikna ba ki paid khappud kin ym duh ei ïa ka jaka bad ba kin ïa im suk im saiñ ha khappud khnang ba kin ïoh ban kamai kajih da kaba suk ba saiñ ban pyndap pynbiang ïa ki ïing ki sem jongki.
