Nongstoiñ, Naitung 24: Ki paidbah jong ka West Khasi Hills kiba shong ha ki shnong kiba don ha shilynter khappud bad ka Assam, kata naduh Malangkona shaduh Kyrshai, kim shym la ïoh shuh ïa ki skhim pynroi kiba ka sorkar ka la mang ban pyntreikam lyngba ka Border Area Development Programme.
Haba pyrshang ban twad jingmut na ki paidbah bad ki riew rangbah na kitei ki shnong khappud, ki la ong ba ha ki snem ba mynshuwa eh shwa ka khlam Covid 19, ha ka por ba u bah A.Lyngdoh u dang long u Border Area Officer jong ka West Khasi Hills, man la u snem ki paidbah kiba shong ha khappud ki ju ïoh ïa ki skhim bapher bapher kum ki surok, ki jingkieng, ki ïing skul, ki madan bad kiwei kiwei.
Hynrei, naduh ba ka sorkar ka la pynkynriah kam ïa u, haduh mynta ki paidbah kim pat ïohi satia kita ki kam pynroi kumba long mynshwa, watla ki ong ba ki shu ïohsngew ba ki don tang katto katne ki jaka kiba pyntrei na ka BADP ban ai sha ki paidbah lyngba u BADO.
U C. Marak na Rangsapara, u la ong ba ha ka por ba u Bah Lyngdoh u dang don ha Nongstoiñ bad u Bah K.P. Pangniang u dang long u MLA ka thaiñ, la ïoh ban shna ïa ki ar tylli ki jingkieng lyngba ka wah Tyrsung. Kawei kaba pynïasoh ïa ka Rangsapara bad ka Aradonga bad kawei kaba pynïasoh ïa ka Aradonga bad ka Nongshyiap bad kiwei kiwei ki shnong. Ia kitei ki jingkieng la mang pisa da ka sorkar na ka Border Area Development Programme.
Nalor kata la ïoh ruh ïa ka skhim ban siang dew bilat ïa ka lynti ïaid kjat kaba ju khot ka ‘longtei maram’, kaba jrong kumba san kilomitar na lad Nongma haduh Upper Langsah. U bah Marak u la ong ruh ba ka jingïoh ïa kitei ki ar tylli ki jingkieng, ka la pynsuk shibun ïa ki paidbah nongshong shnong, namar ka wah Tyrsung ka dei kaba la heh bha khamtam eh ha ka por lyiur.
Haba phai pat sha kiwei ki shnong, ki skhim kiba la pyntrei lyngba ka BADP ki dei ki ïing skul kum ka Kyrdum Govt L.P skul, Umtap Govt L.P.skul, Langpih Govt L.P skul Mawkhap Govt L.P skul bad kiwei kiwei ki skhim kiba la ai jingmyntoi shibun ïa ki paidbah nongshnong shnong.
Nalorkata lyngba katei ka skhim, la shna ruh ïa ka jingkieng ha Kyrshai lyngba ka wah Rambrai na Nongsung kaba pynïasoh bad ka Darephang, Umbah bad kiwei kiwei ki shnong. La lah ruh ban tei ïa ka Guest house ha Kyrshai lyngba katei ka skhim.
U R. Sangma na Kyrshai u la ong ba kaba lyngngoh ka long ba naduh ba la pynkynriah kam ïa u bah Lyngdoh, ki paidbah ki nang pyrkhat ba lehse lada wan da uwei pat u ophisar ha ka jaka jong u kin dang ïoh biang ïa ki jingïarap kumba long ha ka por jong u. Phewse haduh kine ki sngi kim pat ju ïohi ne ïoh sngew ba ki don ki kam pynroi ba ka sorkar ka la mang kyrpang na ka bynta ki shnong khappud na ka BADP skhim.
U la ong ba lehse ka sorkar MDA kam shym la shimkhia ei ei shuh ban mang pisa kyrpang na ka bynta ki bynta khappud ka West Khasi Hills. Lada mang ruh imat tang khyndiat kynsoit ban pynim ïa ka tnad kaba dei peit, lym kumta balei ki lad jingïarap ki duna bha lada ïa nujor bad ki snem kiba kham mynshwa ha ka por jong kiwei pat ki sorkar.
Ha kaba ïadei bad ka jingbym ïoh jingïarap na katei ka skhim ba kyrpang, u Bah Sangma u la ong ba imat u nongmihkhmat ba mynta jong ka Rambrai Jyrngam Constituency, um tip ei ei shaphang katei ka skhim kaba ka sorkar ka la mynjur naduh ka por ba u Dr.Mukul Sangma u dang long u Myntri Rangbah ka jylla.
Lane ka lah ruh ban long ba haduh mynta ym pat don Border Area Officer u ba trei thikna ha Nongstoiñ, lymda kumta ki la dei ban don katto katne ki dak ki shin kiba ka sorkar ka pyntreikam lyngba katei ka tnad.
Ki shnong ha khappud ki dang donkam shibun bah ki kam pynroi bad lada ka sorkar ka pyntreikam shait shait da ki kam pynroi, na ka liang ki paidbah nongshong shnong ruh ki sngew heh mynsiem ban don ha West Khasi Hills. Hynrei lada ka sorkar ka snagp jar jar khlem pyntrei ïa kino kino ki kam pynroi, ka pynrit mynsiem ïa ki nongshong shnong bad ka sorkar Assam ruh kan ïa bteng ban kyntur pud lyngba ki kam pynroi.
