Kumba phi ieid bad jied ïa u Bah Sosthenes Sohtun, jied ruh ïa u Dr DRL Nonglait kyrpad ki heh NPP

Nongpoh, Naitung 24: Ki heh nongïalam ka NPP mynta ka sngi kila hiar sha Jirang Constituency ban pan jingkyrshan naka bynta u kyrtong MP ka party NPP u Dr DRL Nonglait na ka bynta ka elekshon shiteng samoi ban wan, kumba ka party NPP ka don ïaka thong ban jop donburom ha kane ka elekshon shiteng samoi ban wan, namar lah ruh ban ong ba ka Jirang Constituency kadei kawei naki constituency ba khlaiñ bha ka NPP ha Ri-Bhoi.
Ha kane ka sngi ka jingïalap elekshon la sakhi ruh da ka jingdonlang naduh u Bah Sniawbhalang Dhar ba dei ruh u Symbud Myntri Rangbah ka jylla, u Bah Sosthenes Sohtun myntri sorkar ba dei ruh u MLA ka Jirang, u Bah Charles Marngar MLA ka Mawhati, ka kong Rona Khymdeit MDC ka Nongpoh bad kiwei kiwei ryngkat spah ngut ki paidbah kiba la wan ban sngap bad shahsshkor ïaka jingpynshai naka party NPP.
Haba kren ha kane ka sngi na ka liang ki nongkren naduh u Bah Sniawbhalang Dhar, u Bah Sosthenes Sohtun kila pan ka jingkyrshan ba tyngeh na ki paidbah ka Jirang Constituency bad kumba ki ieid bad jied ïa u Bah Sosthenes Sohtun ha kane ka elekshon bala dep, mynta ka kynti kin jied ruh ïa u Dr DRL Nonglait kum u MP ha kane elekshon shiteng samoi khnang ba utei u kyrtong ka NPP un jop donburom kumba ka party katba nangmih ki sngi kala nang kiew haka jingdon ki nongkyrshan.
Kila pynpaw ruh ba ka Jirang Constituency ka dei kawei naki constituency kaba la ioh ka jingkyrkhu lyngba shibun ki jingkylla ha ka liang ka roi ka par ka pule ka puthi namar naduh ba ki paidbah kila jied bad pynjop donburom ïa u Bah Sosthenes Sohtun da ki spah klur ki kam pynroi kila poi ha katei ka thaiñ naduh ki surok ba kongsan, ka model degree college, ka jingpynurlong ïaka civil sub division kaba ki paidbah kila ap khmih lynti la bun snem bad shibun kiwei kiwei.
Kumta ka donkam ïa ka jylla ban ioh ïa u nongïalam sha Parliament u ba dei na ka liang synshar khnang ba ka jylla kan dang kiew shaphrang shuh shuh ha ki kam pynroi bad ban lah ban pynurlong ïa ki mat ba kongsan ba ka jylla ka donkam.
Shuh shuh na ka liang u Dr DRL Nonglait haba kren ha kane ka sngi u la ong ba kum u kyrtong ba ka NPP kala jied bad ibit ïa u ban shim ïa kane ka lyngkor kaba khia, u la rai ba ki mat ba kongsan ba u kwah ban pynurlong hakhmat lada un jop kum u MP ka long ban pynrung ïaka ktien khasi ha ka khyrnit kaba 8 bad kumjuh ruh ka jingdawa ban pynurlong noh ïaka Inner Line Permit kaba dei ka jingdawa kaba la slem ban ïada naka jingwan rung kyrthep ki bar jylla sha kane ka jylla.
U la ong ruh kum uwei naki briew u ba wan naka longiing jong ki nongrep u sngewthuh ïaka jingeh jong kiba bun ba lang, kumta ban ioh ïaka roi ka par donkam hi u nongïalam na ka liang synshar bad ka NPP ka dei kaba synshar haka jylla, da ka jingsngewrit u la kyrpad ïaki paidbah ka Jirang kumba kila sakhi ïaki kam pynroi ka NPP ba kin jied ïaka kyrteng jong u ha kane ka elekshon ban wan naka bynta ka jingmyntoi jong ka jylla hi baroh kawei.