Ai jingkyrshan pura ka COMSO ïa ki paidbah ka Elaka Nongkhlieh ban pyrshah ïa ka Shree Cement

Shillong, Naitung 24 : Ka Confederation of Meghalaya Social Organisation (COMSO) ka la kyntu ïa ka sorkar jylla ban pynsangeh shwa ïa baroh ki kam kiba iadei bad ka karkhana dewbilat Shree Cement ha East Jaintia Hills da kaba kynnoh ba kane ka karkhana dewbilat ka la ktah jur ïa ki trai jaka puta bad kumjuh ruh ïaki nongrep bad dawa ba dei ban siew bai lutksan shwa ïa ki shwa ban pynïaid shakhmat ïa ka kam.
U Chairman ka COMSO uba dei ruh u President ka HYC u bah Roy Kupar Synrem u la ïathuh ha ki lad pathai khubor mynta ka sngi ba ka CoMSO ka la lum kyrkieh ïa ka jingïalang hadien ba la ïoh ka jingujor na ki paid nongshong shnong ka Elaka Nongkhlieh ka shnong ba la seng ïa ka karkhana Shree Cement bad thmu ban tih mawshun na ka jaka ba heh 217 hectare.
U la ong ka jingsngewkhia kam dei tang namar ba la duh ïaki jaka puta hynrei khamtam eh ka jingleh bym suidñiew ïa ki trai shnnong ha kaba ïadei bad ka jingai jingbit ïa katei ka projek.
U la ong ïa ki trai jaka bad nongrep ha katei ka Elaka ym shym la twad jingmut ne ïa syllok shwa ban aiti ïa katei ka jaka sha katei ka karkhana. ïa kane ka juh ka jingsngewkhia bad sngewpyrshah la dep pynpaw wat hakhmat u Myntri Rangbah ka jylla u Conrad K Sangma lyngba ka dorkhast ba la phah sha u ba la soi da kitei ki long ïing kiba shah ktah jur.
U la ong ba ïa ka jingbishar bad sngap paidbah ne public hearing la buh ban pynlong ha ka 31 tarik Naitung 2026 na ka bynta ban tih mawshun ha katei ka jaka.
Ka CoMSO hadien ba la ïamir jingmut bad ki seng kiba don ha ka kynhun kynthup ïa ka Jaintia National Council (JNC) bad ka Confederation of Ri Bhoi People ka la rai ba ïa katei ka jingbishar paidbah ne sngap paidbah la dei ban leh hadien ba la dep ïa pynbeit bad ki trai jaka bad ki nongrep bad dep ban siew bai lutksan sha ki.
U la ong ba ka jylla khamtam ka East Jaintia Hills ka la don lypa bun tylli ki karkhana dewbilat hynrei ki trai shnong kim shym la ïoh jingmyntoi bad kam shai ka jingïapynbeit ruh. Hynrei kaba lyngngoh ka long ka jingai jingbit ïa ka Shree Cement khlem ka jingïapynbeit bad ïasngewthuh jingmut lang. Kumta u la ong ba ka sorkar ka dei ban da bishar bniah bha ïa kine ki karkhana kiba la don lypa bad wad jingtip bniah hato ki la ai jingmyntoi ne em ïa ki trai shnong kiba sah sha kitei ki thaiñ.
U Chairman ka COMSO u la pynkynmaw ïa ki jingïai ïeng pyrshah jongka kynhun ban ai ïa ki jaka puta ki trai ri trai muluk sha ki karkhana jong ki bar jylla ba kin seng ïa ki kam ba heh khamtam kum ha Jaintia Hills ba ki jingmyntoi ki leit tang sha ki karkhana ym sha ki paidbah. Kumta u la ong ba ka CoMSO ka la rai ban ai jingkyrshan pura ïa ki long ïing kiba shah ktah jur la ka jia ne long kumno kumno ha katei ka jingbishar paidbah ne ka public hearing. “ La ka long ne ym long ka public hearing ha katei ka 31 tarik hynrei ka jingïaleh jongka kynhun na ka bynta ki hok jong ki trai jaka bad nongrep kan ïai bteng bad ngin ïadon ryngkat ryngkat bad ki” pynkut u bah Roy Kupar.