Naduh tnum tap ka um ïa ki ïing ki sem ha ka shnong Pahamlang, kynnoh ba dei ka jingtih khyndew

Nongpoh, Naitung 23: Ki paidbah jong ka shnong Pahamlang ha Ri-Bhoi District kila hap ban mad ïaka jingshlei um ba shyrkhei hadien ka jingther u lapbah haka step jong ka 20 tarik mynta u bnai haduh ba ka um kala tap ïaki tnum iing briew bad donbok ba ha katei ka jingjia ym shym don ba mynsaw ne kano kano ka jingjia ba sngewsih lait noh tang ki jingduh ïaki iing ki sem bad ki jingdon jingem baroh.
Naka liang ki nongshong shnong kila kynnoh ruh ba kum kane ka jingjia kam pat ju jia mynno mynno hynrei naduh bala sdang ban tih khyndew naka jingshna ïaka weighbridge haka jaka jong u Bah Renikton Lyngdoh Tongkhar u ba dei u MLA ka Mawkyrwat, ka khyndew kala tuid bad kah ïaka lynti ïaid jong ka um nalor ka jingbym biang ka jaka tuid um kaba la pynlong ïaka um ban lang bad dap ha katei ka jaka.
Kitei ki nongshong shnong kiba la mad ïaka jingeh jingjynjar naka jingshlei um, ryngkat ki nongïalam ka seng Ri-Bhoi People’s Council, sengkmie mynta ka sngi kila leit ruh ban ïakynduh ïa u Additional Deputy Commissioner ka Ri-Bhoi District u Bah Jonathan Shylla ban ïakren halor katei ka jingeh bad ba ka sorkar ka dei ban phaikhmat kumno ban ai ki lad jingïarap sha kitei ki longiing kiba la duh noh baroh ki jingdon jingem naka jingshah rong haka umsaw.
Haba kren sha ki lad pathai khubor naka liang ki katto katne ki longkmie na katei ka shnong Pahamlang, da ka mynsiem kaba khia kila ïathuh ba ki iing ki sem jong ki kila ngam lut haka umsaw kaba lang ha katei ka shnong bad tap ruh naduh tnum iing briew ha kaba mynta ki don hapdeng ka jingeh kaba khraw namar baroh ki jingdon jingem jong ki, kila duh lut bad kila ong ruh ba kane ka jingjia kam pat ju jia mynno mynno hynrei naduh bala sdang ban tih khyndew bad kah lut ïaka lynti ïaid jong ka um.
Kum ki longkmie kiba mad ïa katei ka jingeh kila kyrpad ruh ïaka sorkar ba kan isynei lem bad ban phaikhmat sha ki namar ki dei tang ki longkmie kiba duk rangli bad kiba kamai hok da ka umsyep, hynrei ban iohi ïaka iing ka sem bad ki jingdon jingem ba kin shah rong lut haka umsaw tang nakadaw ka jingleh khlemakor ka long kaei kaei ka bym lah ban pdiang kumta kila kyrpad ïaka sorkar ban weng noh mardor ïa katei ka jingjia ba kan nym jia shuh hadien habud.
Naka liang u Bah Jayson Lennox Nongrum kum u nongïalam ka RBPC u la ong ba mynta ka sngi kila leit sha ophis u Deputy Commissioner ka Ri-Bhoi ryngkat bad ki longkmie ka dei namar ka jingjia kaba ktah mationg ïa kitei ki longkmie kaba la pynlong ïaka seng ban shimkhia ïa katei ka kam bad ban buh da ka jingthoh halor ka jinglap bad ka jingshem jong ki, khnang ba ki bor pynïaid district ki ioh ban pyrkhat ban ïarap ïa kitei ki longiing.
U la ong ruh ba katkum ka jinglong jingman naka liang ka seng kala ioh jingtip haka 20 tarik ba kala don ka jinghap slap kaba jur haduh ba ka um kala tap ïaki iing ki sem bad kum ka seng kala leit ban jurip haka 21 tarik ban lap ïaka daw tynrai jong ka jingshlei um, kaba la pynlong ïaka seng ban bitar namar baroh shi katta lada slap makna katno katno ruh kam ju don ka jingshlei um, hynrei kane ka dei ka sien kaba ar naduh u snem bala dep naduh bala tei ïaka weighbridge haka jaka jong u Bah Renikton Lyngdoh Tongkhar.
“Lada ngi sngap ïaka kyrdan u briew kum u MLA ba mynta bad u myntri sorkar barim ngi sngew ba ngim donkam shuh ban batai ïaka kamram jong u, hynrei namar ba i shna ïa kano kano jaka haka jaka ba don ki nongshong shnong la dei ban peit lang ïaka bha ka miat jong kiwei, namar ngi lap ba kato ka jaka ban rung sha ka jaka jong u Bah Renikton, kala don ka jingtheh khyndew bad pynhap maw bad don tang ar tylli ki jaka tuid um kiba rit” la ong u Bah Jayson bad haka por ba dap ka um kitei ki nongshong shnong kim don por shuh ban rah ïaki tiar ki tar namar ki la bunkam ban phet krad ïalade bad pynlait im ïala ki jong ki khun.
U la ong ruh ba donbok ba kadei ka miet kaba don ka phainal jong ka Fifa World Cup ba ki briew ha katei ka shnong ki dang ïa peit miet, lym da dei kumta ka lah ban don ka jingjia ba sngewsih bad kane ka dei kaei kaei kaba ki bor ba dei peit ki dei ban shimkhia mardor ban pynbha ïa katei ka jaka, bad kum ki nongshong shnong kim kwah ïaka spah ka phew hynrei haba kheiñ kyllum ka jingduh kam jin shuh ïaka 50 haduh 60 lakh naduh ki ing ki sem, ki kwai bala pdem mano ban shim ïa ka jingkitkhlieh? Hato u bah Renik un siew ïaka bai lutksan?
Naka liang ka seng kala kren shai ruh hakhmat ki bor district ba kaei kaba donkam mynta ka long ban don noh ka jingjurip, watla kala don ka jingleit khmih da u MLA ka thaiñ bad u BDO hynrei kam shym don ka jingkhot ïa kitei ki longiing haduh mynta ban ai ka jingpynthikna ba ha kine ki khyndiat sngi ka dei ban don noh ka jingtrei bad wad ki lad ki lynti ban lait naka jingshlei um khamtam ba kum ki paidbah ki kwah ban shna noh syndon da ka jingkieng ha katei ka jaka, u la bynrap.