Nongpoh, Naitung 23: Haba ther halor ka jingshim kabu ki heh spah ban wan pynbiej ïa ki paidbah tang ha ka por election, u MLA ka Umroi bad uba dei ruh u Vice president ka TMC hapoh ka jylla, mynta ka sngi u la ther tyngeh ïa ki heh spah ba thmu ïa khun election bad u la kyrpad ruh ïa ki paidbah ba ha kane ka kynti kim dei shuh ban dang biej ïa ki heh spah bad shuwa ba kin jied ïa ki nongmihkhmat ki dei ban da bishar bniah.
“Keiñ noh keiñ noh ïa ki heh spah ban jied ïa ki kum kita ki nongmihkhmat” ong u Bah George B. Lyngdoh haba kren ha ka jingïalang ka paty TMC kaba la long mynta ka sngi ha Umlaper ba hap ha Mawhati Constituency bad kane ka la thew shai ruh ïa u MLA ba mynta ka Mawhati ha kaba wat la ki paidbah ka Mawhati hati ki la pynjop don burom ïa u ha ka election 2018 bad mynta pat u la iehnoh khunswet ïa ki paidbah da kaba u la iehnoh ïa ki paidbah ban leit ïa khun pat na kawei ka Constituency.
U Bah George B. Lyngdoh u la ther tyngeh ruh halor ka jinglong jingman hapoh ka jylla ha kaba mynta ym don shuh kita ki riew proh jabieng ne ki riew shemphang kiba nud ban ïa khun ïa ka election, namar la trei jubor ka bor pisa bad dei tang kita ki heh spah kiba nud ban wan ïa khun election namar ki theh da ka pisa tang ha ka por election bad ynda la jop pat ki shim kabu na ki paidbah ban lum spah bad khwan bor tang ban myntoi shimet bad ym na ka bynta ka eh ka shon ki paidbah.
Namar kata, na ka liang u Bah George B, Lyngdoh kum u nongmihkhmat na Ri Bhoi u la kyrpad ïa ki paidbah ka Ri Bhoi bad wat ha ka jylla hi baroh kawei ba la dei ka por ba kin ai jingsneng ïa kine ki heh spah kiba wan ban pynbiej ïa ki paidbah tang ha ka por election bad ban pynduhjaid ïa kine ki kyrtong heh spah ka dei hi tang ka jingstad ki paidbah ha kaba ka jingjied ïa ki nongmihkhmat kam dei satia ban ïoh da kita ki kyrtong heh spah bad ki dei ban long kita kiba proh jabieng bad kiba ïohii jngai na ka bynta ka eh ka shon ki paidbah, u la bynrap.
