Nongstoiñ, Naitung 22: Sa shisien biang ka mynsiem jong ka jingsngew syier bad sheptieng, ka la rung ha ka jingmut jingpyrkhat jong ki nongshong shnong ka Langpih bad ki shnong ba marjan, hadien ba ki trai shnong ki la ïohi ïa ka jingwan rung wan tur jong ki pulit Assam sha kane ka jaka, kaba long haduh arsien ha ka shi bnai khlem da pyntip ïa ki bor sorkar ka West Khasi Hills District, Meghalaya.
Na ka liang Bah Jylliewsingh Marweiñ uwei na ki samla rangbah jong ka thaiñ Langpih, u ba dei ruh u khun jong u Bah Trasdingland Nonglang sordar shnong Mawsikar, ha ka sngi balang u la kiew sha Nongstoiñ ban ai jingtip da ka shithi sha ka Deputy Commissioner West Khasi Hills halor ka jingwan kiew ki pyrton pulit jong ka Assam sha Langpih kaba la long ha ka 15 bad 20 tarik mynta u bnai.
U Bah Jylliew u la ong ba katei ka jingwan ka jong ki pulit Assam, ka dei kaba khlem da pyntip ïa ki bor pynïaid district ne ïa ki nongïalam shnong. Hynrei kane ka jingleh ki pulit Assam ka la pyntieng pynsmiej ïa baroh ki paidbah nongshong shnong Khasi bad Garo kiba don ha katei ka thaiñ Langpih.
Haba ïakren bad ki lad pathai khubor, u Bah Jylliew u la pynpaw ba ka jingrai ban pynneh pynsah hapdeng ka Assam bad Meghalaya kumba ka long mynta kam don jingmut ei ei satia. Namar haba kawei ka liang ka ïaleh ban ïaid hi marwei, ym don jingartatien kan pynthud ïa ka shongsuk shongsaiñ ha katei ka thaiñ.
Nalor nangta, u la pynpaw ruh ba ha ka jingjia shah siat jong ki saw ngut ki mynsiem ba kordor ha ki ktang suloi ki pulit Assam ha u snem 2010, ka dang ïai sah ha ka mynsiem jong ki paidbah, haba ki ïohi ïa ki pyrton pulit Assam kiba wan kiew sha Langpih. U la ong ba katei ka jingjia ka dang ïai long kaba sah jingkynmaw ha ki nongshong shnong kiba ïai bteng ban im da ka jingsheptieng.
Na ka liang jong u Bah Jylliew ha ka dorkhas ba u la aiti sha ka Deputy Commissioner, la pynpaw ba kum katei ka rukom leh ki pulit Assam, ka dei ka jingthmu ban pynthud bad ban pyndik ïa ki nongshong shnong ha Langpih.
U la ong ruh ba kane ka jingwan jubor ka lah ban pynduh noh ïa ka jingshaniah bad pynmih pat ïa ka jingïakynad ha shilynter ka thaiñ khappud, lada ym shimkhia noh mardor ïa kane ka kam. Ha ka shithi la kdew ruh ba ka jingleh bym patiaw ïa ki riti synshar tynrai kum ïa ki nongïalam shnong, ka long kawei na ki daw ban pynlong ïa katei ka thaiñ kaba syier.
Ha kane ka jingleit ïakynduh ha ryngkat ka jingdonlang u Bah Trasdingland Nonglang bad kiwei kiwei ki riew rangbah ka thaiñ Langpih, la buh ruh ka jingkyrpad ïa ka Sorkar Meghalaya ba kan rah ïa kane ka mat bad ka Sorkar Assam, ban pynthikna ba kano kano ka jingleh nangne shakhmat jong ki pulit ha Langpih, dei ban leh tang ynda la ai lypa ïa ki jingtip bad don ïa ka jingïatreilang bad ki ophisar ka thaiñ bad ki nongïalam shnong.
Ki la dawa ruh ba dei ban pynlong ïa ka jingtohkit halor ki ar tylli ki jingjia kiba dang shen bad ban pynthymmai ïa ka jingïakular na baroh ar tylli ki Jylla, kata ban bud ryntih ïa ka jingïatehkular ban pynneh pynsah kumba ju long.
