Lyngba ka NICE BHARAT Mission ha Meghalaya; Lamkhmat ki Nurse ban pyllait im ïa ki mynsiem briew

Shillong, Naitung 22:Ka Jylla Meghalaya ka la shim ïa ka sienjam kaba kongsan ban tei ïa ka ri lyngba ki kam pyllait im ïa ki para mynsiem briew ha kaba ka Indian Society of Emergency and Cardiac Nurses (ISECN) ka la sdang ïa ka NICE BHARAT Mission (Basic Heart Action & Resuscitation Awareness Training)-ISECN Basic Life Support (BLS) Provider and Instructor Course, kaba la pynlong da NICE Meghalaya hapoh ka jingïalam jong ka Nurses Initiative for Community Empowerment (NICE).
Kane ka prokram kam dei tang ka jingsam ïa ki certificate, hynrei kane ka sienjam ba la pyllait ka long ban pynkupbor ïa ki nurse kum ki nongïalam, ki nonghikai bad ki nongpyllait im ïa ki mynsiem briew ha ka imlang sahlang.
Ïa kane ka sienjam la ïalam da ka jingïohi jngai bad ka jingïalam kaba khlaiñ jong u Mathew Varghese V, Chairman, NICE; ka Denny Mariam Oommen, National Secretary, NICE; u Shoukkhatali V, Director, ISECN; bad u Fameer C.K., General Secretary, ISECN, kiba dang bteng ban pynkhlaiñ ïa ka jingïalam jong ki nurse bad ka jingpynkupbor ïa ka imlang sahlang ha kylleng ka ri India lyngba ka jingaiti lut jong ki.
Ka jinglah ban pynlong ïa kane ka prokram ha Meghalaya ka la urlong lyngba ka jingïalam kaba aiti lut jong i Kong Rikadeisuk Suting, National Joint Treasurer, NICE bad Northeast Zonal Head; Kong Dolly Oslene Jyrwa, State Convenor, NICE Meghalaya; Antareep Sarania, Programme Coordinator, NICE Meghalaya; Kong Alisha Nongrum, State Secretary; Kong Wandahun Langbang, Joint Secretary, NICE Meghalaya bad ka kynhun NICE Northeast baroh kawei.
Ka jingaiti lut jong ki, ka jingthmu kaba bniah bad ka mynsiem jingïatreilang ka la pynurlong ïa ka jingïohi jngai kaba ïasyllok, bad ka pyni shai ba haba ki nurse ki ïatylli da kajuh ka jingthmu, ki lah ban ai mynsiem ïa ka imlang sahlang bad sdang ïa ka jingïaid paidbah kaba lah ban pynim ïa shibun ki jingim.
Ban pynthikna ïa ka kyrdan kaba halor tam ha ki jinghikai bad ka jinglah ban pyntreikam ha ka jingtrei, ïa ka jinghikai la pynlong da ki nonghikai kiba tbit, kiba kynthup ïa ka Durgadevi Elumalai na Chennai, u C. Desanth, u Avesh Ansari, bad ka Deepika Sharma na New Delhi.
Da kaba leit sha kylleng ka ri ban hikai bad synran ïa ki nongïashim bynta, kine ki nonghikai kiba shemphang ki la ai ïa ka jingtip Basic Life Support (BLS) kaba la pdiang ha ka pyrthei kaba la pynshong nongrim halor ki sakhi bad ki jingtbit ha ki kam pyllait im bad ki rukom treikam kiba bniah . Kane ka la pynkhreh ïa ki nurse ym tang ba kin shim ia ki sienjam da ka jingsngewskhem ban iarap haba jia ki jingshitom klongsnam kiba kynsan kynsan hynrei ruh ban long ki nonghikai ha ka lawei kiba lah ban pynsaphriang ïa kine ki sap pyllait im ia ki mynsiem briew ha ka imlang sahlang.
Ha kane ka prokram la ia don lang ka Prof. Nochovono Tase, Principal-cum-Professor, College of Nursing, NEIGRIHMS, kum ka Kongsan. Haba kren ha ka jingïalang, ka la ai ka jingïaroh ïa ka jingïohi jngai kaba donbor kaba don ha ka kyntien BHARAT – Basic Heart Action & Resuscitation Awareness Training, bad ka la ai jingïaroh ïa kane ka mission kaba buh ïa ki nurse ha ka bynta ba hakhmat eh ban pynkylla ïa ka imlang sahlang.
Da kaba sngewthuh ïa ka jingthmu kaba shai jong kane ka mission, ka la pynshlur ïa ki nongpynïaid ban nangpynheh ïa kane ka sienjam, da kaba pynpaw ïa ka jingngeit kaba skhem ba ka don ia ka bor pynkhih kaba kongsan ha ka ri, kaba pynkhlaiñ ïa ka jingpynkhreh ba kyrkieh bad ban pyllait im ïa kiba bun bah ki mynsiem briew.
Hadien ka prokram aijinghikai, napdeng ki 94 ngut ki nurse, 32 ngut kiba tbit tam ki la shah jied ban shah hikai ha ka ISECN Basic Life Support Instructor Course, bad ki la long ka kynhun ba nyngkong eh jong ki Nurse Instructors kiba la shah bynshet ban pynïaid shakhmat ïa kane ka mission. Ka jingkitkhlieh jong ki kam kut tang ha kaba hikai CPR; hynrei ka long ban pynlong ïa kiwei ban sngewskhem, ban pynsngewthuh paidbah bad ban tei ïa ki imlang sahlang kiba don ka jingkhlaiñ, ha kaba bun ngut ki briew kin long kiba la pynkhreh ban leh eiei ha ki minit ba kongsan tam jong kano kano ka jingjia ba donkam kyrkieh.Ka jingthmu ka long kaba suk hynrei kaba don jingïohi jngai: Hikai ïa iwei i nurse kan pynkupbor ïa ki spah spah ngut bad pyllait im ïa ki hajar ki mynsiem briew.